四月底大市急回之前，有隻股票叫做中訊軟件（299）搞上市，市場對佢評價唔錯，招股反應亦算熱烈，但可能大市氣氛開始轉差，隻股一上市就潛水。
聽講中訊有唔少大戶坐到成手貨，所以最近傳出有人幫佢做推介，並接觸芬佬，睇吓佢哋有冇興趣。由於隻股基本因素唔差，有芬佬受落亦唔出奇，或者假以時日，中訊股價有望重返水面。
中訊主要業務，為日本資訊科技行業客戶提供外包軟件開發服務。4月底以每股1.77元，招股集資1.1767億元，但上市後股價最低跌至1.35元，近排叫做好番多少，噚日上升1.89%，收1.62元，成交金額83.52萬元。
另外，沉靜咗一段時間嘅抽新股活動，又再活躍，最新招股嘅國產ICQ騰訊（700），市場傳聞深受大陸投資者歡迎。
經紀陳話，一來班大陸同胞用開佢哋嘅平台嚟談心，二來多隻國產科網股在美國炒到不亦樂乎，因此佢哋憧憬在香港上市嘅騰訊一樣有好表現。
慕容小初