旺角街頭巧遇潮界中間人──大隻標，原來佢正頭痕幫老闆搵舖位搬舖。大隻標其中一位老闆喺太子「聯合」賣日本街牌水貨，開業以嚟生意總算唔錯，全因佢老闆入貨別致兼另類，勝在人冇我有，利錢自然高。但唔知點解，每次件貨賣出後，約莫個零月就有假貨推出，有時重喺同一個場有得賣，非常尷尬。大隻標最後幫老闆FindOut原因，原來行內班假貨商人係舖頭熟客之一，難怪每次幫襯後，跟手就定期推出相關假貨。
大隻標用頸上毛巾邊抹汗邊話：「呢輪我成日幫老闆看舖，相對地對個場了解多咗，我發現原來行內好多冒牌貨起辦佬都鍾意嚟呢度入貨。好似地下賣水貨雜誌間書店，每期最新嘅法國名牌袋同表書就經常被佢哋買到斷巿，而樓上嘅波鞋舖，新返關刀鞋就通常被班辦佬以熟客身份留起晒。可能個場近深水埗，嗰頭好多物料公司，辦佬就貪方便經常喺嗰頭蒲。佢哋通常買完書買埋辦，跟手上商場樓上飲茶，然後落大南街打辦，重方便過數碼港嘅一條龍喇！」大隻標果然有理。
主持人：大食Jack
八卦熱報：