暑假一到,例必有一兩日要車住成家人呢度去嗰度去周圍玩,無番架高載客量嘅車又真係唔多方便,所以各大車行都趁機力Sell旗下嘅七人車,日產都唔例外,將旗下三部七人車升級,而最後一擊就係架Serena2.5,俾多二萬蚊就可以加DVD連數碼影音組合、桃木內飾同外圍其他裝飾,加埋全車廂真皮座椅及其他貼身設備,坐車都可以好似返屋企咁,絕對可以滿足屋企人坐車要歎嘅條件!
記者:黃婉冰 攝影:蔡鴻雯
ImageGirl:Hidy
Serena未升級售價為$249,800,新升級版之所以多二萬蚊,全因車內車外都加咗升級設備(白金組合),設備內容包括有7吋LCD芒連DVD、VCD數碼影音組合,中控台、表板及車門全改用上真皮同桃木裝飾,側鏡、後泊睹後鏡全改為電鍍銀鏡,以舒適角度嚟講,DVD影音組合最煞食,無可否認LCD芒算不上大,只可以話係夠用,但好彩有唔錯嘅音響組合做配搭,加上車身隔音設備不錯,音響效果拍得住屋企個私人影院,另一好處係有個電視機坐鎮車廂,小朋友坐長途車都唔怕扭計坐唔定!
七座位款式選用一副2500ccNEO引擎,配合四前速自動波箱,行車表現穩定且寧靜,單手握軚盤,腳踏油門,全程只需要出動右半邊身,已可以輕易操控全架車,加上車身較高及無尾設計,睇位絕無難度,波箱亦設有雪地及動力模式選擇,以配合不同路面需要,前者睇怕都無咩機會用到,反而後者在高負荷時可大派用場,基本上這部七人車具備有家庭車所需要嘅條件,亦屬UserFriendly之選,但唯一缺點係車身略高,1.8米高停車場可以唔使諗,1.9米就最穩陣!
估唔到一架七人車會有12個杯架之多,梗有一個喺左近。
引擎:2488cc直四DOHC
馬力:160ps/5600rpm
扭力:24.5kgm/4000rpm
傳動:四前速自動波
懸掛:(前)麥花臣(後)多連桿
制動:(前)透氣碟(後)鼓式
輪胎:195/65R15
尺碼:4595×1695×1885mm
軸距:2695mm
新車售價:$269,800
車輛提供:合誠汽車(28035333)