意大利籍大導演貝托魯奇（BernardoBertolucci）憑《末代皇帝溥儀》橫掃奧斯卡後，之後拍嘅《小活佛》同《盜美人》等都不復當年勇。不過，喺早幾個月被選為香港國際電影節參展電影嘅新作《戲夢巴黎》似乎又重現生氣。
《戲夢巴黎》故事背景發生喺一九六八年火紅年代嘅法國巴黎，地點同貝托魯奇七二年嘅經典性愛片《巴黎最後探戈》一樣，唔知係巧合定係刻意安排，當時嘅巴黎係各地影癡嚮往嘅勝地，但同時亦係歐洲學運爆發嘅地點，戲中米高彼特（MichaelPitt）扮演美國交換生，初到巴黎就即刻去咗法國電影資料館，因而識到路易斯加維（LouisGarrel）同伊娃格蓮（EvaGreen）扮演嘅影癡兄妹。
騷亂終於爆發，罷工罷課令巴黎頓變死城，兩兄妹趁父母遠遊帶埋米高返屋企玩自閉，佢哋又玩估戲名，又扮經典電影場面，不過最緊要係玩埋性，法籍兄妹徘徊喺亂倫邊緣，可算係玩得相當瘋狂。
雖然片中涉及不少性愛場面，但係其實貝托魯奇喺呢部片好明顯係向經典電影致敬，成套戲充滿咗法國新浪潮電影氣息，兩男一女結伴同遊似足杜魯福（FrancoisTruffaut）嘅《祖與占》。
另外，套戲入面亦加插咗好多荷李活經典舊片片段，相信會勾起唔少影迷嘅往日情懷。