國家級統戰部女部長劉延東啱啱先至講完，唔好有咁多無謂爭拗，呢頭講好說話，嗰頭即時督卒再點火頭。陳方安生喺《時代》周刊發表意見遭到老左狂攻，嗰頭行政會議成員梁振英，再挑起爭拗，質問大律師湯家驊寫嘅一篇文章，裏面講到東歐共黨倒台，佢「既羡且妒」，係乜嘢意思，係咪好想中國政府亦跟住垮台？
見到人哋好，既羡且妒，即是既羡慕，又流口水。冇錯，當羅馬尼亞暴君壽西斯古橫屍，蘇聯同東歐共黨政府喺一九九○年左右逐一垮台，人民重獲自由，可以民選自己嘅政府，當時簡直係普天同慶，香港人恨唔到，理由點解，十分之清楚，做打手，大肆掀起文字獄，梁振英嘅政治嗅覺敏銳過格力狗，插完劉慧卿，今次又斷章取義指湯家驊喺個心裏面顛覆咗中國政府，若然喺前清，梁振英一封密函呈報乾隆皇帝，不但湯家驊就即時會遭到公差鎖拿斬頭，連相關人事都周身蟻。
可能湯家驊冇欠人「一屁股債」，佢出選立法會，左諗右度都唔知點樣抹黑佢，用把放大鏡睇佢嘅專欄，於是就發現一條咁嘅思想顛覆罪！
喺文革時期，美國發射太空船登月球成功，若果有啲中國知識分子膽敢喺日記之中歡呼美國太陽神號嘅登月成就，亦一樣會變為支持美帝嘅現行叛國反革命。振英哥執住湯家驊寫過嘅文章，揸住「既羨且妒」四個字就「無限上綱」，陳太話香港已經類似係文革亂局，話口未完，即時就證實，真係冇講錯。
梁振英係行政機關領導人，佢嘅立場，當然代表董政府嘅立場。見到蘇聯東歐垮台，唔歡呼鼓掌，唔通如喪考妣？咁睇怕每年喺柏林圍牆倒塌嗰日、同埋羅馬尼亞獨裁者壽西斯古被槍斃嘅死忌日，特區政府係咪應該下半旗致哀，兼由三司十一局集體企開一排，齊齊搥胸頓足兼痛哭，咁先證明到香港特別行政區係一個「與國際接軌」嘅「國際大都會」？
傳真︰2623-9278
電郵︰