黃秋生呢排認真唔好彩，除咗有台灣傳媒話撞到佢同孟廣美喺台北拍拖行街之外，噚日又有周刊話佢上周四去台灣之前，同個貌似何韻詩嘅女仔喺中環餐廳撐枱腳，重大字標題寫佢唔理老婆同個仔去「偷食」。
秋生噚日同馮仁昭講起呢件事，好無奈咁話：「本周刊慌死我唔死得咁，朋友嚟之嘛，偷食即係食咗，真係食咗我又唔怕佢寫，最慘冇食吖嘛，早知食啦！佢哋又走去搵我老婆同我阿媽，要講咪講我囉，唔好搞我啲屋企人！」
秋生又話佢阿媽同記者講完嘢又唔通知佢，馮仁昭話佢阿媽答記者嘅嘢都好大體，但係秋生話佢老婆唔鍾意，估唔到秋生外表咁大男人，其實都幾顧及老婆嘅感受。
至於同孟廣美喺台灣行街件事，秋生話嗰個係工作人員，根本唔係孟廣美，重話：「黐線，佢邊有孟廣美咁高呀！」
秋生呢排工作又多緋聞又多，證明娛樂圈係旺桃花即係旺事業，人紅先有狗仔隊跟嘅，秋生應該高興嘅！
羅嘉良噚日去亞視錄影鳳凰衛視中文台節目，佢話有成二十年冇去亞視，今次錄影之前都有知會無綫，大家已事先作好溝通，佢重話目前重欠無綫十集片約，下年五月到期。而早前有報道話佢同無綫高層樂易玲食午飯，佢解釋只係普通朋友食餐飯，當認識個新朋友喎！
幫過《悲情城市》同《愛情白皮書》做配樂嘅日本音樂組合S.E.N.S.，原定今個月尾喺會展舉行兩場音樂會，點知佢哋臨門撻Q，工作簽證出現問題，被迫取消兩場騷。馮仁昭知道有唔少樂迷會好失望，而𠵱家有關方面已經接受退票手續。
周杰倫噚日喺台灣出席「第一屆錢櫃星秀選拔賽」，啱啱喺新西蘭拍完廣告嘅周杰倫，話喺當地上身着五件厚衫，但下身依然保持唔着底褲嘅習慣，現場就開始起哄，點知周杰倫嬲嬲地咁話：「我已經從金曲衰到現在，反正我就是沒穿內褲，請大家以後不要再問下去了。」大家都唔知衰同唔着底褲有乜關係，原來之前有人話王力宏攞咁多獎係因為有條好運底褲，所以周杰倫講起底褲就周身唔舒服。
劉德華日前應羅霖邀請，擔任新城節目《羅林名人館》嘅壓軸嘉賓，華仔係羅霖同佢兩個囝囝嘅偶像，所以佢今次訪問得特別開心。華仔講到即將喺九月舉行嘅演唱會時話：「今次演唱會有乜特色？入場嘅觀眾淨係見到我已經足夠，人靚歌甜喺我身上表露無遺。」我馮仁昭真係頂佢唔順！
