英國駐港總領事館噚日黃昏喺港麗酒店舉行酒會，慶祝英女皇壽辰，總領事柏聖文本來請咗財政司司長唐英年嚟做主禮嘉賓，點知下屆特首大熱門嘅唐唐，咁嘅風頭火勢又豈容企錯隊，聲稱臨時要帶富貴商家團上東北，於是由政務司司長曾蔭權爵士頂上。
柏仔係英國佬，當奴亦係大半個英國人，見面梗係份外親切，更何況當年係柏仔教當奴打煲呔，話咁會靚仔啲，都算係佢「師傅」。兩個煲呔友喺台上祝酒，離唔開希望中港兩地加強聯繫，做多啲生意嘅客套說話，只談經濟，不講政治。
不過，台下就相當精采，因為全城嘅猛人高官，除咗去咗東北嗰班大孖沙嚟唔到外，其他都到齊，包括在《時代》周刊寫文章嘅陳四萬、白鴿黨前主席李柱銘，大Sir鍾士元、行會前成員楊鐵樑、廣播處前處長張敏儀以及最近周圍點火嘅行會反英戰將梁振英。
如果唔係主人家慶祝女皇生日，真係唔知會唔會肉搏，事關梁振英喺酒會前唔單止向人氣急升嘅湯家驊下戰書，要佢解釋一篇有關「六四」文章嘅睇法，重燒埋陳太同媽田嗰叠，搖身一變已經成為共產黨，慶祝女皇壽辰，佢又到，英國領事館就笑騎騎睇嘢嘞。
傳真︰2623-9278
電郵︰
