舊年曾經炒過一陣，但之後一直冇影嘅上海銘源（233），最近傳聞靜極思動，最新嘅動作就係邀請一班財經名嘴北上參觀。
小初記得，經紀陳以往都有提過上海銘源，隻股在1月中，曾經以先舊後新方式，每股作價55仙，配售1億股，集資淨額5340萬元，部份貨源由中信資本坐住，之後股價曾經炒上0.70元樓上。
早排大市氣氛差勁，好多股份都跌到四腳朝天，上海銘源亦唔例外，曾經跌穿0.50元。近排雖然好番啲，噚日平收0.52元，但仍然低於1月中的0.55元配股價。
聽講公司除咗邀約班財經名嘴外，重會與分析員會面，睇嚟稍後可能會有報告推介。但小初則認為搵齊實力人馬落場，加多兩錢肉緊炒起股價，咁重更加直接同實際。
另外，小初噚日提到基金沽售工業股的換馬行動未完結，但經紀黃唔同意，話個別優質工業股仍有一定吸引力，其中龍記集團（255）近期有芬佬密密吸納，令股價回升頗多。
龍記噚日升4.4%，收3.575元，成交金額831萬元。
慕容小初