陳小韻及蔣怡昨日衣着性感地往銅鑼灣出席荔枝酒活動，兩人均表示因怕酒醉失儀，所以不會豪飲。陳小韻透露將往大連拍劇，今年父親節不能抽空往上海陪父親陳曜旻，但已準備了一份驚喜禮物送給他。
陳小韻及蔣怡昨日衣着性感地往銅鑼灣Gossip出席Dita荔枝酒活動，兩人即場調校水果酒。陳小韻表示平時夜蒲都會飲酒，她說：「唔通周圍啲朋友飲得你唔飲咩，但係都會適可而止，因為我最怕飲醉酒冇儀態，咁樣着幾靚都冇用啦。」
早前表示會專注事業發展的陳小韻，透露即將往大連拍攝台灣偶像劇《長春花》，她說：「第一女主角係韓國演員，我係第二女主角，其他男角就係台灣演員，我預咗拍呢套劇會好似軍訓咁辛苦㗎啦。」
陳小韻更指渴望接拍化妝品或洗頭水廣告，她說：「拍得我靚就得啦，就算女性用品廣告都好呀。」問她父親節會否飛往上海與父親陳曜旻慶祝？她說：「應該唔會啦，不過我已經準備咗一份驚喜禮物送畀爹哋。」
蔣怡昨日中午才由上海返港，她說：「返到屋企即刻梳洗換衫嚟呢個活動，簡直好似生死時速咁緊湊。」她表示自己酒量極淺，飲半杯啤酒已經會醉，閒時只會用酒炮製甜品及蛋糕。
蔣怡說：「好彩冇遇過俾人迫飲酒，有時見到啲人飲醉酒又笑又喊，都覺得好恐怖。」問她現時多棲發展，做模特兒，又當主持及拍電影，會否作新嘗試扮醜女？她笑說：「扮醜女唔難吖，朝早起身唔化妝咪得囉。」
採訪、攝影：JessicaNgan
