越秀投資好多年都冇在港賣樓，年初食正旺市賣嘅薄扶林富臨軒，一百二十個單位只剩十四個。
越秀（香港地產）董事長歐兆禾話，雖然唔憂賣，今次都係應市場需求，推出最後兩個頂層相連單位，接受買家出價洽購。
為令買家同時有另一種生活享受，以及體驗越秀大陸樓盤有幾好，買家只要喺月底前成功購入相連單位，即可獲贈價值八十二萬人民幣南沙濱海花園別墅一幢，面積大約千七呎，真可謂係「買一呎送一呎」。
兩個富臨軒相連單位，意向呎價六千。其他貨尾單位都可以傾，平均呎價五千幾。
富臨軒相連戶，成千六呎，每呎六千，要近千萬，送八十二萬南沙樓，只相當於八個巴仙。
自由行客大量來港，對居住要求較低，所以惠及中低檔次三四星級酒店，以及賓館，引起投資者覬覦。可以轉做呢類用途物業，身價大漲。
第一太平戴維斯投資部董事黃明添話，上環荷李活道二六三號商廈，現以招標方式出售。呢幢商廈，政府同意可以轉做有一四八間客房嘅酒店或賓館。截標日期為七月十五。
呢幢商廈九八年落成，二十四層高，總樓面五萬九呎，現時出租率三成，買家收番改建機會更容易。現時上環寫字樓呎租唔使十蚊，較優質都係十零蚊。若轉做賓館，呎租可以超過三十蚊。
近排豪宅成交淡靜，不過無論地產代理或者測量師行，都不約而同唱好後市，令到業主驚賣得太平而不敢隨便沽貨。
萊坊國際物業顧問就最誇張，最近發表有關豪宅市場報告，表示近月豪宅交投轉靜只屬過渡期，隨着本港經濟好轉，以及海外僱員增加，豪宅需求大增而供應有限，預計豪宅獨立屋，今年底前可高見三萬蚊呎。即係話，未來半年，至少重有得再上升二十五個巴仙。睇得咁好，難怪業主企硬唔肯減價啦。
天水圍慧景軒開始入伙，噚日輪到第一千戶收樓，長實隆而重之，請埋執行董事趙國雄、售樓部劉啟文與發展部莫偉聰，陪同屋主鍾生、鍾太收樓，咁大陣仗都係第一次。
長實派出顧客服務部員工，幫鍾生鍾太收樓，即場睇睇有乜要執漏，大班記者朋友做見證。有咁多人陪佢哋收樓，相信屋主買樓時點都估唔到。
劉啟文話，已經有成千個客收樓，反應幾好，所以特別趁噚日賣吓廣告。置業人士收樓，開心又有錢賺，劉啟文都戥佢哋開心。
代理通常最留意對手一舉一動，大量收集對方消息，美聯深圳分行遭同行搗亂事件，噚日在中原網頁發布，但中記未有加鹽加醋，只係講出關注事件會否影響行業運作，希望大家正視阻遏歪風。
美記回應，指是當地同行借鎖匙不遂，於是搗亂，分行遭倒垃圾及毀壞電腦，職員即時報公安，並委託律師跟進要求賠償。公司向有指示，要求員工克制，對員工表現感到滿意。
內地樓市蓬勃，好易出現同類事件，政府實有需要研究對策，令行業得以規範化。
蘭西
電郵地址：
