港股上午原本升得好地地，直迫12500，但午市回得頗急，最後升幅收窄至17點，收報12344，成交135.57億元。
市場傳出有藍籌地產股想抽水，導致午市急回。新地（016）倒跌1.5%至65.50元。不過，收市後冇任何動靜，照計現時班大孖沙重喺國內考察，點會得閒搞配股呢？
中電信（728）噚日升勢持續，一度上過2.60元，但見配股包銷商瑞銀出貨，補倉盤亦不急於入市，最終以2.55元收市，升2%，成交高達9.27億元。
駿威（203）等汽車股在月初曾被拋售，當時重以為市場錯誤理解新的汽車產業政策，不利國內汽車市場。真正的答案噚日終於揭盅，原來國內銀監會正調查汽車貸款市場，市傳國內汽車貸款壞帳高達1000億元人民幣咁嚴重。姑勿論壞帳高達千億元是否屬實，單是證實銀監會進行調查，已嚴重打擊內地汽車銷情，因為每次當銀監會進行調查，國內銀行都十分敏感，要批出貸款相當困難。
駿威噚日逆市跌6.6%，收報3.175元，成交高達5.86億元，睇落似有大戶洗倉。華晨（1114）亦跌3.6%，收報2.65元，成交逾1.1億元。過去兩個月，國內汽車銷售大幅放緩，且不時傳出汽車減價戰，現時汽車股不宜博反彈。
市場傳渣打（2888）買唔到交通銀行，轉為入股光大銀行，持有光銀的光大控股（165）即受青睞，股價炒高6.3%，收報3.35元。此外，連閩信（222）都有人吼，皆因佢持有廈門國際銀行，一旦被外資睇中，斷估都有唔細升幅。
阿虎