拜仁慕尼黑嘅德國龍門簡尼都算樣衰，早前話曼聯想斟佢，點知曼聯領隊費格遜喺禮拜一出嚟澄清冇咁嘅事，簡尼兜口兜面食咗個檸檬。
呢位大哥雖係拜仁主力，但因佢今屆成日揩嘢搞到球隊食白果，加上又因私生活唔檢點而成日俾狗仔隊跟蹤，搞到佢勁冇癮想離隊到其他聯賽發展；而佢同佢老竇重不約而同咁話，曼聯打緊佢主意。
點知曼聯領隊費格遜喺接受德國體育雜誌《踢球者》訪問時咁話：「我哋對簡尼冇興趣。」講真，簡尼呢隻檸檬自己攞嚟食，事關佢都成三十四歲人，而且水準不斷跌緊加上人又麻煩，試問曼聯又點會要佢呢？
之但係，若然佢喺今屆歐國盃踢出○二世界盃嘅水準，隨時成為搶手貨；但唔係我求大俠睇死佢，呢個情況應該唔會發生。
正當意大利準備歐國盃征途，因缺態落選嘅恩沙基本來斯人獨憔悴。不過意足總話有意召佢踢奧運，基仔前日亦表態話如果獲徵召，就一定出番份力咁話。佢有心報國係好，但我求大俠怕佢以「空降傘兵」身份同班後輩未必夾得嚟；一吓唔覺意輸波，可能做埋代罪羔羊喎……
皇馬會喺七月五號開操，有份打歐國盃嘅九個球員好似魯爾、碧咸同施丹咁就可喺十六號先歸隊；但佢哋嫌假少，竟要求由佢哋所屬球隊出局嗰日開始計放二十一日；假設西班牙喺四強出局，咁魯爾同希古拉等會喺二十二或二十三號先返皇馬練波。家陣波都未開就諗放假，真係離譜。
美國夢幻隊又多一個「逃兵」，帝王控衞碧比最近正式退隊，理由係想有多啲時間休息吓，但據可靠消息話，佢其實係怕奧運會發生恐怖襲擊事件先退隊。搞到𠵱家除咗艾華遜同鄧肯外，夢六嘅原班人馬都做晒逃兵，夢幻隊變成一支雜牌軍，今年想攞奧運金牌都幾抿水！
喺總決賽第一場打到不知所謂嘅湖人老將披頓，噚日操練後被大批記者圍住，佢大大聲話一分鐘內就見記者。唔知係唔係「手套」怕畀記者問到口啞啞，竟然「放飛機」，自己偷偷地由後門「走路」，累班記者等餐懵，事後重俾NBA罰咗五千美金，做球星做到佢咁都算小家囉！