阿Sam是一個音樂家，阿Sam是一個詩人，阿Sam是一個哲學家，阿Sam是一個熱愛生命的人。
演唱會中，看着阿Sam的笑容，聽他講講近來的生活、對事物的一些看法，一些因為他講所以好好笑的笑話，「過制、爽呀爽、殺死人咁勁、你睇我幾有型，咁就……啦喂，柯厘吉蒂……前世。」聲音中，我彷彿回到了我的中學時代。
由阿Sam唱中文歌開始，我就逐首跟住佢唱，記得曾吹過《有酒今朝醉》嘅口哨撩鄰校嘅女學生。記得曾有位拔萃嘅女學生話先生唔准佢哋聽阿Sam嘅歌，嫌通俗咁話，霎戇！正如小學時有個所謂老師問我點解睇金庸嘅武俠小說咁唔生性一樣，霎戇！記得點解自己咁醒，中學畢業時已明白「人生如賭博，贏輸都冇時定，贏咗得餐笑，輸光唔使㷫」，「命裏有時終須有，命裏無時莫強求」，知道半斤八両的公平與不公平，明瞭天才與白癡只差一線，斷唔可以做莫大毛同埋尖沙嘴Susie，就算生平第一次同日本妹搭訕嘅日語對白都係抄自《日本娃娃》。
原來阿Sam是我的Mentor，原來他對我選擇怎去做一個人有這麼大的影響，真幸運，我們的那一代有阿Sam帶領我們成長。
看見外甥仔、女大聲跟住阿Sam唱：「曳搖共對輕舟飄」、「邊有半斤八両咁理想」、「其實我還是深深愛着你」、「你有天才，佢有天才，應該要自愛」、「無敵是愛」，那種感覺暖得很。
阿Sam的歌聲是香港的歌聲，我提議用《半斤八両》做香港特區區歌，我贊成！