隔晚美股大升，港股升過136點之後回軟，全日升得17點。港股前日先行大升，𠵱家稍為消化，啱晒，消化過後再向萬三點推進。
中移動（941）進帳15仙，聯通（762）進帳10仙，兩隻國內電訊股總共拉動恒指13.7點。另外隻中電信（728），亦升兩格。睇嚟，啲錢正流入電訊股。
電盈（008）原地踏步，收5.35元。距離上次宣布同國內網通合作嘅日子，已經有3個禮拜，估計合作條件快趣揭盅，相信對電盈有利，例如雙方注入資產成立合作公司，電盈會有特殊盈利，又或者將部份本港固網業務賣畀對方，收錢改善財政狀況，同時又有特殊盈利入帳。資本家做生意，冇着數邊會制？小小超今回點都會做齣好戲。
電盈睇好，揀Call輪炒，9762諗得過，屬鎖定回報輪，10月到期，輪價16.6仙，表面上溢價0.3%，槓桿率32.2倍，數據睇嚟好筍，但因屬特種輪，要另外計過。據發行商網站資料，隻輪實際溢價6.5%，槓桿率32.2倍，有效槓桿率6.4倍。以呢組數字計，靚過晒其他電盈輪。
九倉（004）回落35仙，收21.45元。個市未玩完，吼住九倉再回多啲，低吸Call輪9086，隻輪11月到期，輪價43.5仙，溢價2.7%，槓桿率4.9倍。
新地（016）調整1元，收65.50元，再跌少少，吼Call輪9391，12月到期，輪價70仙，溢價8.2%，槓桿率9.4倍。
章盛