孫明揚為官多年，道行梗有番咁上下，所以老董搵佢執房屋地政呢個爛攤子，可謂最明智抉擇。八方噚日喺酒會碰到孫公，見佢神采飛揚，梗係啦，地又賣得好，中環填海又復工，啲居屋有人要，連紅灣半島單官司，孫公都話冇埋，真係極好消息。八方笑孫公同鄭裕彤應該傾得掂數，冇理由重要政府賠錢。
做咗兩年問責局長，孫公示範咗佢解決困難嘅能力有幾高。剩番落嚟，就只有一單政府有冇違反公屋租金不超過入息中位數一成嘅官司等判決，孫公話輸贏唔緊要，有判決就可以做嘢啦。
至於分拆出售房委會轄下零售及停車場設施嘅計劃，佢話進行得好順利，年底就有基金賣。孫公賣花讚花香，猛話回報一定正，叫八方儲定錢買番啲。
（圖）孫明揚
傳真︰2623-9278
電郵︰