民主抗爭又起新風浪，陳方安生同美國《時代》周刊撰寫專文，秉良心直言，駁斥中國政府，嚴正指出港人嘅普選訴求，唔係搞甚麼「港獨」，並指斥中方打壓港人普選，手法有如文化大革命！
陳太擁有國際影響力，句句擊中要害，親中陣營自然痛極尖叫。民建聯主席馬力話，陳太「抹黑中央」。
邊個抹黑邊個，三個月以來，全港有目共睹。去年七一大遊行，五十萬人怒吼，要求普選特首。基本法講到明，二○○七年之後，香港有權普選特首，並經中方前港澳辦主任魯平一九九三年親口證實，二○○七年之後香港政制發展，完全係香港內部事務，中國不會干涉！
特區七年來搞到一鑊泡，港人要求○七○八普選，連中方都唔敢講係違反基本法。普選若果等同「港獨」，咁就係基本法批准「港獨」，魯平親口支持「港獨」，指鹿為馬，顛倒黑白，當香港人係白癡。
陳太話中方另搞文革，有冇屈中方？睇吓事實：
文化大革命中共將劉少奇鄧小平人身攻擊為叛徒、內奸、工賊、走資派，策動紅衞兵瘋狂批鬥，今次中方一樣將要求平反六四嘅司徒華、支持○七依法普選嘅李柱銘、劉慧卿．一概標籤為「漢奸」、「港獨」、「吳三桂」，土共傳媒加維園阿伯，有組織有預謀，展開集體狂躁式辱罵，直頭係文革還魂！
文化大革命毛賊東鼓吹「血統論」，扯埋人民嘅父母祖先出嚟鬥，中國外貿部副部長安民，謾罵李柱銘先翁為「反華反共」，若然李老太爺卜葬喺和合石，話唔定維園阿伯一早就聽命走去拆墳。
文革搞武鬥暴力，今次喺香港，司徒華在街頭遭到土共衝擊推撞，維園阿伯瘋狂追打無辜青年，梁耀忠辦事處遭到土共潑屎，馮檢基遭到暴力恐嚇。重未計三名嘴封咪內情。對於維園暴力，警方笑騎騎袖手旁觀，唔見佢施展對付示威學生嘅鷹爪鎖喉，梁耀忠辦事處遭潑屎，土共老人只輕罰一千，平過喺星光大道吐一篤痰。
文革特徵，全部齊晒，加上三流政棍信口開河，例如譚惠珠，話港人未有為爭取普選而燒炭嘅個案（二○○七年冇普選，繼續由北京欽點奴才治港，咁○七後經濟若然繼續衰退，若然有一單市民因失業而燒炭，唔知肥珠到時係咪會將啲炭灰生吞晒落肚？）
文革呢條劣根，中國政府唔會斷，香港文革暴動首領楊光，獲得大紫荊章獎賞，當時陳太做政務司司長，曾經大力反對，對於文革喺香港借屍還魂、碟仙上身，陳太以時代證人身份，梗係有義務向全球公布吓事實，等全人類分享吓香港老左嘅虐待狂快感。香港有冇文革，胡溫同老左都心知肚明，到今時今日重扮天真？未免過份啲啩。
傳真︰2623-9278
電郵︰