白鴿黨負責協調九月選舉嘅李永達（圖）呢輪俾鄭宇碩教授call爆機，原因係協調工作做完又要做過，睇怕到七月，都有變數。達仔好誇張咁話，鄭教授call佢嘅次數比佢老婆重頻密。
達仔為今次選舉都算筋疲力盡，先有羅致光忽然「冇紀律、冇黨性」自己話唔選，之後又有黃偉賢忽然失蹤，最近又到港島選情告急，要再做民調，睇吓係咪有人要轉區，嗰度牽涉一位現主席楊森同前主席李柱銘，所以你話達仔幾頭痛。
不過，達仔今年算向媽田交足功課，因為搵到四個新人出戰功能組別，佢淨係搵唔到有資歷嘅民主派工程師肯出嚟參選，有意者可致電23977033或email去dphk.org.hk搵達仔。
有人笑達仔太保守，今次泛民主派應該贏晒，達仔同八方講，佢都想等民主大浪到，咁佢同楊森就可以去Bali瞓番幾日，唔使做到隻狗咁。
傳真︰2623-9278
電郵︰