籮霸珍妮花洛庇絲（JenniferLopez）上個星期六喺洛杉磯同拉丁歌手MarcAnthony結婚，消息傳出之後，籮霸嘅發言人面對大班傳媒查詢，佢話對婚訊「既唔證實亦唔否認」。
不過當日有狗仔隊喺籮霸屋企附近偷影到婚禮嘅過程，證明籮霸第三次結婚嘅消息冇花冇假。原來來自紐約嘅籮霸，當日叫東岸嘅親朋戚友去佢屋企出席一個下午茶敍，結果喺下午六點左右，籮霸就換咗一身象牙色婚紗出現，重戴上價值二百五十萬港紙嘅NeilLane鑽飾，而Marc亦以一身米白色踢死兔現身，大家先知佢哋玩結婚。
從當日婚禮嘅圖片所見，籮霸當日打扮得好靚，重忙於接受老人家嘅祝賀，據講佢哋重請咗RickyMartin做表演嘉賓，在場嘅嘉賓個個都盡興而歸。不過今次籮霸結婚結得咁倉卒，有人懷疑佢大咗肚，所以將婚事速戰速決。不過有人又笑佢七年內結三次婚，睇怕好快就會打破玉婆伊莉莎伯泰萊（ElizabethTaylor）結婚八次嘅紀錄。
其實籮霸今次結婚，我羅拉真係好想知道佢舊愛班亞弗力（BenAffleck）嘅反應，不過據聞班仔近日因為支氣管炎被迫入廠，啱啱喺籮霸結婚嗰日出院，當被問到舊愛嫁人嘅感受時，班仔豎起兩隻拇指，但個樣就有啲無奈。