美國就業數據不俗，油價又回落，中國則繼續放風話手上重有許多宏調措施可用，唔一定要加息，兼且短期內將落實QDII，令到亞洲區股市急速反彈，港股噚日以裂口高開逾200點，全日收報12326，升304點，成交137億元。
國企指數更勁升逾5%，一直被淡友壓在配股價2.30元附近的中電信（728），噚日終出現一次較似樣的挾淡行動，全日勁升7.5%，收2.50元，成交激增至逾6億元。中電信自配股後，包銷商一直將收市價守在2.30元附近，淡友久攻不下，彈藥耗得七七八八，當然要盡快平淡倉。
先前多宗借殼上市交易如東燃（432）及和記環電（757），股民追入皆損手爛腳。不過，國美借殼上市的中國鵬潤（493）則在天時地利人和配合下，復牌後股價大升113%至0.315元，高於全日平均成交價0.297元，噚日追貨的股民平均賺5.7%，就算在最高位0.34元追入，亦只蝕約7%。
不過，今次鵬潤以高約50倍PE作價收購國美，肯定偏高到離晒譜，應否捧場真係要諗過先，家電零售市場無論在國內外都競爭激烈，究竟點樣高速增長呢？
蒙牛（2319）新股獲205倍超購，並以3.925元上限定價，但唔知點解中海集運（2866）反應只屬一般，唔通因為集資額太大，好難炒得起？不過，抽水高達160億元的平安保險，據聞頗受芬佬歡迎。另一隻細細粒容易食，抽水僅3200萬元的普施基因（8250）亦獲有心人支持。黑客話，此股有抗炎英雄鍾尚志做非執董，點都會有啲號召力。
阿虎