娛樂圈入面無論係做幕前定幕後，都有好多同性戀者，只係做幕前嘅人比較唔肯公開認，已故嘅張國榮屬少數。台灣同志主持蔡康永最近出咗本書，叫做《那些男孩教我的事》，講佢身邊嘅男人，不過全部都用數字做代號。
蔡康永喺書入面提到佢嘅第九十八號男人，係一個港星，蔡康永重話帶過佢去台灣228公園散步兩粒鐘，又帶咗對方返屋企傾偈，蔡康永證實呢個人就係張國榮。更令人詫異嘅係，一位佢提及嘅第九十七號男人，懷疑就係金城武，不過，佢之所以會提起，唔係話佢係同志，而係金城武俾蔡康永形容為靚仔到喺合理範圍以外，所以不得不提。
蔡康永書中話呢位九十七號男人想做導演，所以搵佢老闆去請蔡康永嚟度橋。咁啱得咁蹺，蔡康永之前出席簽名會，講到「會發光」嘅明星，就有提及金城武，重話佢係飛碟型男人，去到邊都帶畀人驚喜嘅性感旋風，而蔡康永之前又真係應金城武老闆葛福鴻之邀見面，根據以上種種迹象嚟睇，九十七號男人就係金城武啦。
嚴淑明一直留喺台灣發展，佢對於名模林志玲頗有意見，嚴淑明話：「外國名模會流露一種特質，感覺很自然，但林志玲給人的感覺太造作，不夠自然。」對於有傳林志玲嘅飯局價係全台之冠，佢話：「我不相信，世上沒有這種白癡。」
無綫外購日劇、由木村拓哉主演嘅《夢想飛行GoodLuck!》星期日首播，平均收視二十點，即有一百三十一萬觀眾，但另一節目《2004勁歌金曲優秀選第一回》雖然有多位當紅歌星撐場，但係平均收視只得十七點，即一百一十二萬人支持，成績普通。木村拓哉嘅魅力認真不同凡響！
羅國維噚日喺香港殯儀館出殯，特首董建華夫人同汪明荃都有去送佢最後一程。董太同羅國維嘅遺孀殷巧兒擁抱慰問，大約逗留咗十分鐘就離開。阿姐噚日都好有心，專登一早到場，都係留咗一陣就走，不過佢對記者嘅問題完全冇回應。
利嘉兒噚日喺銅鑼灣為佢做代言人嘅美容產品做宣傳，佢重即場義賣咗成百支面膜，利嘉兒話自己𠵱家皮膚又白又滑，全賴用咗呢啲產品，至於男友周國豐有冇受惠，佢就笑言男友皮膚好好，而且男友又唔係行靚仔路線，所以唔使用呢啲產品。
