美股升，美元跌，油價跌，刺激港股。恒指升304點，收市12326，啱啱升破上周四對上一連5日嘅頂位，個市繼續有得睇。
個市睇好，唔想揀藍籌埋手，可直接揀恒指Call輪炒。9788與9773條件好相近，兩者同係9月28日夠期。9788輪價13.7仙，溢價3.8%，槓桿率15.6倍；9773輪價14.8仙，溢價4.0%，槓桿率15.1倍。9788靚過9773少少，但交投則唔夠佢多。唔計較交投少啲，同埋有心理想揸耐啲，則可揀9232，11月到期，輪價23.9仙，溢價2.8%，槓桿率9.7倍。
招商局（144）與中遠（1199）都係泛珠概念股，招商局收10.20元，升35仙，中遠收10.40元，升40仙。兩件紅籌睇好，可以搵啲相關Call輪。招商局Call輪揀9264，8月到期，輪價10.7仙，溢價3.6%，槓桿率9.5倍。中遠Call輪揀9315，11月到期，輪價23.7仙，溢價7.4%，槓桿率4.4倍。兩件Call輪嘅共同缺點，係交投唔得旺，買賣要畀啲耐性。
綜合企業股中，太A（019）勢靚，有機會可低吼Call輪9176，明年3月到期，雖然係鎖定回報輪，因為壽命長，啲數據唔使太計較。正股變化，隻輪點都跟住。隻輪昨收18.5仙，單日升幅9.5%。
紅籌國企一家親，中信泰富（267）升3.8%，Call輪9139數據唔錯，10月夠鐘，輪價38.5仙，溢價1.7%，槓桿率4.9倍，弊在交投疏落。
章盛