大市氣氛好轉，新股蒙牛（2319）反應超好，令好多之前暫停嘅IPO，重新出番晒嚟，稍後新股上市，又會一隻接一隻。
華潤勵致（1193）喺年頭，因為旗下半導體業務華潤上華擬搞上市，曾炒過一輪，但因為中芯國際（981）上市股價即插，連累街坊冇運行，加埋早排大市回落，華潤勵致股價亦受壓。
事過境遷，唔少之前跌過龍嘅股份已大幅回升。經紀黃話，估計華潤勵致亦唔會例外，聽講有外資大行重新留意，除咗旗下華潤上華可能重提上市之外，華潤勵致的壓縮機業務，據講表現亦唔差，點計現價都係超值。
華潤勵致噚日升5%，收0.85元，成交股數289萬股，金額244萬元。股價雖然較早前低位0.66元回升頗多，但比起4月初高位1元水平，仍然有水位可執。
另外，經紀黃所鍾情嘅金山工業（040），噚日公布全年業績靚到暈，盈利比去年同期上升152.6%，賺1.74億元，末期息加特別股息，合共0.10元。但芬佬工業股的換馬行動似乎未完結，未能刺激金山股價勁升。
慕容小初