年輕人今時今日着衫唔夠潮，實俾人笑。唔怪得屯門譚李麗芬紀念中學，噚日搞咗個冬季校服預展，推出三套設計緊貼潮流嘅風褸，由幾個戲劇組同學充當臨時模特兒，喺四十幾個班代表面前行catwalk，選出最受歡迎嘅冬季新校服。
度呢條好橋嘅課外活動主任申玉超話，「舊款西裝校褸，開胸式設計，一到天寒地凍就唔夠暖。新設計嘅風褸形校褸勝在夠輕，又防風，熱過頭可以拆走件內裡。設計時重考慮到同學追求時尚嘅要求，盡量做到希望同學着上身，覺得好自豪，對學校有歸屬感。」
學校絞盡腦汁，透過民主方式，搜集同學意見，再決定採用邊套新校服。不過仍有同學嫌新校服設計唔夠Nike風褸咁型，有人重話好似福爾摩斯乾濕褸。唉，𠵱家啲同學仔真係奄尖。
傳真︰2623-9278
電郵︰