潮界金牌經紀鬍鬚弟非常睇唔起拍賣網上嘅炒家，原來佢曾被外國賣家呃過，自此痛恨網上炒賣活動。上個禮拜，警方掃蕩網上賣歌神演唱會嘅IT黃牛黨，鬍鬚弟表示大快人心，鬍鬚弟手舞足蹈表示：「差人上次冇拉炒皇馬波飛班炒家，等到今次歌神復出先至做嘢上網拉黃牛，可能佢哋寧撐歌神都唔撐皇馬！話時話，今次呢班炒演唱會飛嘅人，實在太過份兼愚蠢；上次人哋炒皇馬飛都唔敢明目張膽，通常會借炒第二啲嘢為名，其實炒飛為實。例如借意炒賣礦泉水一支，但勝出者可獲皇馬波飛兩張，最後支礦泉水就被炒到$5,000一支，但有兩張靚位皇馬波飛贈送，警方捉到起訴時都有一定難度。
「今次炒歌神飛班人可能係新手，喺拍賣網上連第幾排坐咩位都寫埋，如果張飛係以信用卡過數，警方就更有充份證據喇。不過警方都冇偷懶，再掘深啲，發現原來班友仔蠢到自己托價；賣家於拍賣網上托價原來係詐騙罪，屬刑事案；美國早已有案例，所以香港差人咁有信心上門拉人。話時話你哋班友經常喺eBay同Yahoo炒波鞋同玩具，自己成日托價以為我唔知，我遲早去差館告發你哋……」鬍鬚弟此時已開始失控，可見佢對網上炒風恨之入骨。
主持人：大食Jack
八卦熱報：