港股噚日破位而上，恒指同期指都創出今個升浪新高。
恒指以200點的大裂口高開，一舉而衝破50日線（12120）阻力，最高上到12360，大升338點，好友全面控制大局，結果以12326收市，升304點，成交配合，有137億元。期指收12350，高水24點。
噚日一升，亦衝破頸線12250的阻力，確認由4月底開始的複式頭肩底形態，短期唔排除在頸線水平之上會有爭持，但中期的上升目標就指向13500。國指高收4303，大升215點，中期的頭肩底形態亦接近完成，暫時50日線（4334）同頸線（4400）有阻力，個人認為衝破的機會頗大。
3隻鋼鐵股升幅由3.8%至5.5%不等，近日鋼價回穩，成為鋼鐵股上升動力。中國東方（581）同3隻鋼鐵股相比，PE最低，噚日升幅亦最大，高收1.52元，升6.3%。
中國東方主要生產鋼坯同帶鋼，今年3月上市，招股價2.75元，上市後曾高見3.65元，今時今日，只係企於1.5元水平，PE低到3.1倍，其實已過度反映鋼鐵業宏調嘅因素，只要鋼價企番穩，中國東方股價就會由低位大幅反彈。
鋼價其實並唔係一般人想像咁「淡」，未來嗰兩季，唔排除個別產品會再有新高價出現。寶鋼係中國最大的鋼鐵公司，最近就宣布第3季絕大多數產品的出廠價將維持不變，亦即係企於第2季的高位，其中鍍鋅板更由每噸7200元人民幣加價到7700元人民幣。
其實，宏調主要係針對低端鋼材市場，而中高端市場需求仍大，加上供不應求，尚需依靠進口，因此，中高端鋼材價格不但能夠企穩，且還有上升空間。
中國東方為提高毛利率，正向中高端鋼材發展，製造高附加值、競爭較小及用途更廣的產品。摩根大通報告就指出，中國東方的毛利率不斷改善，即使鋼鐵價格回軟，中國東方的盈利，仍可維持在03年的水平。至於04年（12月年結）的盈利，估計仍會有2至3成的增長，PE重係企在3倍水平。
中國東方走勢亦形成頭肩底，1.6元係頸線位，升破後，照度上去，可見2.15元，屆時PE亦只不過4倍多。
郭兆誠