中國一聲宏觀調控，受影響嘅項目紛紛下馬，江蘇鐵本鋼鐵係第一個大傷者，投資者已經動用咗四十幾億元人民幣，現在唔准上馬，死未。據報道，另一家大鋼鐵廠，「寧波鋼鐵」，香港與美國投資者用咗十二億美元，預計年產六百萬噸鋼鐵，已經接近完成階段，八月可以投產，但已被國家發展及改革委員會叫停，命運未卜。
大編輯對中國情況好熟，佢對左丁山講過：「香港人、美國人到內地揸車過馬路時見到紅燈就停，黃燈就慢油，綠燈先至去。內地人就有唔同嘅做法，見到綠燈慢慢行，見到黃燈踏油門，見到紅燈就搏命衝，從來唔會停低嘅。外國投資者碰上宏觀調控，以為係紅燈，即刻慢晒軚，苦口苦面。內地人就會立即製造既成事實，同上頭講數！」
如此紅黃綠燈理論，左丁山似乎係第一次聽見；大編輯話：「我哋香港人自幼稚園開始都學曉遵守交通燈，紅燈停、綠燈去，深入人心，𠵱家上到大陸，點夠人爭呀！」唉，香港之所以受國際重視，皆因香港人係最守法嘅中國人，大陸台灣同我哋冇得比，此乃教育之功。估唔到上去大陸做生意，好快就領悟到殘酷現實，博得就博，理佢甚麼紅綠燈。長此以往，香港好快就會變成一個中國城市，唔係國際城市，外國投資者當然會選上海，唔選香港啦。七十年前，香港未係國際城市，外國人眼中只有上海。香港人要繼續遵守幼稚園教育，見到紅燈就停呀！