美國5月份就業數據理想，進一步證明呢次經濟復甦唔係假貨，聯儲局本月底加息0.25厘幾成定局。美股上周五嘅反應係升，反映加息預期已經消化，股民開始向樂觀嗰邊睇。
油價回落之勢初步形成，短期內若然恐怖分子休假，股市應該跟番經濟走，吼位揸Call輪，勝算應較Put輪高。
杜指上周五只升46點，港股今日若然高開唔多，可以買番啲恒指Call輪。對象都係嗰3件，搏殺嘅可快炒末日輪9099（留意本月29日屆滿，千祈咪戀戰）；想遠期些少，可揀9773同9799，都係9月28日到期。
滙控（005）近日有勢，大市若向好，大笨象唔會企定定，滙控Call輪要揀啲嚟買。有搏殺精神兼手腳快嘅，9173可以考慮，呢件7月19日屆滿，開始步向末日，溢價3.9%唔係平，吸引在72.7倍槓桿率，啱短炒。
年期稍長嘅有9629，玩到8月6日，溢價3%，槓桿率25.7倍，爆炸力亦不弱，勝在交投夠旺，買貨賣貨都唔會困難。論抵買始終係9783，9月尾到期，溢價1.9%，缺點係槓桿率12.7倍，爆炸力冇咁強。
小象恒生（011）嘅Call輪亦可一顧，對象係9748同9782，都係9月28日到期。9748溢價3.5%，槓桿率19.9倍，9782溢價4.4%，槓桿率25.8倍。
章盛