六四一過，好快就到7.1，好似普選傘、遊行tee、太陽帽等遊行紀念品，近日陸續推出市面，其中一副由中大學生會製作、喺深水埗社區組織協會賣二十蚊嘅「下台啤牌」，相當過癮。
呢副牌每張都用一位政治人物講過嘅廢話做主題，好似階磚A，係老董喺7.1後，連續三日都只係識得講嗰句「早晨」、大D係掃把頭話「放長雙眼睇啦」、梅花9係教統局局長李國章名言「俾人叫打機局長好過叫搞機局長」。成副牌最有娛樂性嘅，係一對由董太做主角嘅Joker，分別印上「香港人就係識得complain、complain、complain」同「千祈、千祈、千祈，洗手、洗手、洗手」呢兩句金句。
負責製作嘅中大學生會話，侯賽因同季炳雄相繼喺睡夢中落網，但係董建華仍好夢正酣，五十萬人叫佢唔醒，一百萬人都叫佢唔醒。製作「下台啤牌」係要回顧高官政客講過乜嘢，力證佢哋喺夢中治港，應該立即下台。不過呢班人面皮太厚，就算用啲牌一張張摑佢，都唔會醒喇。
傳真︰2623-9278
電郵︰
