前晚歌神許冠傑喺紅磡體育館舉行首場復出演唱會，唱到十二點幾都未唱完，認真high，啲迷哥迷姐成十二年冇見偶像，梗係冇所謂，重大叫抵睇，不過，班老歌迷就有啲頂唔住，猛去洗手間。
阿Sam一向掌握香港人嘅民情，一入場就先有神秘禮物送，歌迷梗係高興，點知係一個紅白藍膠袋，裏面有口水肩、紙皮袋、橡皮圈、安全扣、面具連吹BB，重有阿Sam家人嘅舊照，因為人人有份，嚟捧場嘅九巴董事長陳祖澤夫婦，以及九巴副主席梁乃鵬都獲贈一個。
阿Sam後嚟重自己着住件紅白藍膠袋衫喺台上講解紅白藍膠袋有幾好，出外旅行必備，因為夠實用，比名牌更正。
唔知係咪阿Sam魅力沒法擋，喺散場嘅時候，八方見所有有頭有面嘅人、好似足總前主席余錦基、飛哥飛嫂以及聯交所嘅周文耀同盛善祥都攞住個紅白藍回鄉袋走，真係幾有趣，睇怕平時一定未見過。
傳真︰2623-9278
電郵︰