現年三十三歲嘅籮霸珍妮花洛庇絲（JenniferLopez）早排同拉丁歌手MarcAnthony打得火熱，噚日美國雜誌《People》同《Us》就報道，原來籮霸前日已經喺洛杉磯同Marc舉行咗個小型婚禮。如果消息屬實，呢次係籮霸喺七年來，第三次結婚。
其實籮霸喺今年一月先啱啱同班亞弗力（BenAffleck）分手，點知未夠一個月佢就已經火速搭上Marc。但我羅拉點都估唔到，Marc喺上星期先至同佢個前環姐老婆辦完離婚手續，咁快又可以收拾心情再娶。
據講，今次籮霸只係請咗四十個來賓出席，其中一個出席者話：「呢個係一個好低調嘅婚禮，新人淨係請最親密嘅朋友同屋企人出席。籮霸事前冇同任何人講過佢哋會結婚，我哋聽到呢個消息都嚇到儍咗！」
雖然籮霸同Marc嘅發言人到噚日為止都冇證實到婚訊，不過佢近排去到邊都戴住Marc送畀佢隻巨型鑽戒，睇嚟都似好事近嘞！不過籮霸九七年同餐廳侍應OjaniNoa段婚姻只係維持咗一年，而佢○一年同舞蹈員CrisJudd結婚，短短九個月又告離婚收場，今次籮霸同Marc嘅婚姻可以維持幾耐，我羅拉就要放長雙眼睇。