美聯物業噚日贊助沙田馬場賽馬，名為美聯盃賽日，為咗隆重其事，包咗個包廂，招呼一眾VIP，有買家、投資者與發展商，蘭西興緻勃勃去凑熱鬧。
現場所見，好多發展商畀面出席，部份重參與遊戲與頒獎。唔少難得一見嘅舖位投資者，好似小巴大王馬亞木，與舖王「波叔」鄧成波等，都有現身。其中第四場美聯舖王讓賽，美記搵咗「波叔」做頒獎嘉賓㖭，可見佢老人家喺舖行內地位有幾高。其他住宅及寫字樓投資者，較為人熟識有黎汝遠與陳清白等。
期間，美聯集團主席黃建業捐咗十八萬八畀健康快車，搞活動之餘，不忘行善。
蘭西又發現，有啲發展商都好鍾意跑馬，手執馬經猛咁刨，跟住又落注試吓運氣與眼光，結果有贏有輸。
喺第七場美聯樓神盃開跑前，蘭西側問記者問樓神新地雷霆有乜心水，雷霆話睇好一同四號。
結果一號由頭帶到尾，四號後來居上得第二。可惜蘭西唔賭馬，走寶！
政府上個月底恢復賣地，其中沙田銅鑼灣山路一幅地皮，由嘉華國際以高於市場預期嘅八億六千五百萬投到。嘉華後嚟表示，會起大單位同埋小量別墅。
幅地皮喺正新地嘅道風山曉翠山莊隔籬。
噚日蘭西見到新地代理執行董事雷霆，問起新地，啱啱補咗地價嘅道風山地皮，會諗住點搞，佢話都係起大單位與別墅。
新地喺道風山可以發展嘅地皮有三幅，一大兩小，可建總樓面七十萬至八十萬呎，會先發展大嗰幅，𠵱家搞緊圖則。不過，就算賣樓都會遲過嘉華。
馬灣珀麗灣當年開賣第一與二期時，發展商為增加樓盤吸引力，喺大嶼山買咗個沙灘，改名叫做藍鯨灣，只係畀住客用，夠晒尊貴獨特。
𠵱家珀麗灣第三期收票如火如荼，為咗引起客戶注意，中原地產安排三十名準買家，由員工陪同，一行八十人，坐船去藍鯨灣實地睇吓，重喺沙灘度玩餐飽。
中記提供埋太陽油、毛巾等用品畀啲客用，夠晒週到。
與此同時，香港置業都唔執輸，又帶一批客去藍鯨灣實地視察。
睇嚟，代理行之間鬥得幾激烈，有啲招數大致相同。
甲級商廈近排市道麻麻，因為投資者減少，乙級商廈唔同，重有買家肯追價，主要覺得價格仍算平，只要價啱就願意買。聽講，有啲單位銀行估唔到價，只要唔係差太遠，買家一樣照買。
另外，商舖近排都靜咗，聽聞有啲舖位投資者撻定，業內相信，遲啲可能重多。不過價格未受影響，因為業主殺定後，舖位再售，仍然叫番之前個價，賣到就變成賺多筆。就算減價，只係將殺定嗰筆嘔番出嚟，點都唔會平過之前。
蘭西
電郵地址：