歌神回歸 飛哥大讚超值懷舊

歌神回歸 飛哥大讚超值懷舊

歌神許冠傑(Sam)前晚在紅館開騷,吸引一萬多名歌迷支持,所有觀眾盡興而回。因封咪事件成焦點的李鵬飛與妻子拍拖到場,他大讚演唱會十分抵睇。

許冠傑的十場復出個唱前晚在紅館開鑼,現場氣氛高漲,整個演唱會歷時四個半小時才完結,大部份歌迷均看足全場才離開,只有少數歌迷因要趕乘尾班車,才提早於晚上十一時多離場。
前晚有不少藝人及政界人士捧場,包括早前因封咪事件而成為焦點的李鵬飛與太太,他大讚說:「我畀一百分,好抵睇同超值,亦都好懷舊!」而專誠來捧阿Sam及女友周慧敏場的倪震則說:「好睇,自己喺後台入去,所以就賺晒,但係我覺得值五百蚊,觀眾賺多咗一百蚊,因為唱多成個鐘,但我就覺得阿Sam重有好多歌都未唱。」

八月再捧場
而前晚無論老、中、青歌迷欣賞完阿Sam的個唱後,均有讚無彈,大部份觀眾都表示阿Sam個唱值一百分,又大讚他的狀態非常好,只是開頭聲線略為沙啞,但後段已經愈唱愈清,其中陳婆婆和紐約回港的孫女表示:「幾好睇,阿Sam好弗,見番佢好開心,啲新人都好有前途,嘉賓唔一定要巨星。」
觀眾葉生及葉太則說:「我哋唔覺得太長,長啲重好,八月我哋會再睇,最好冇嗰啲Sam'sAngel同芳華十八,全部係阿Sam就最好。」另外,有日本男歌迷更攜帶阿Sam的唱片,在紅館外播放。
採訪、攝影:駱華齡、何國豪

《阿Sam好弗,見番佢好開心!》陳婆婆與孫女

日本男歌迷帶着私伙珍藏CD,在紅館外播放。