李玟（Coco）日前喺台灣出席OMEGA手表宣傳時，自爆有好多人追，除咗外籍富商Bruce，重有霍啟剛嘅朋友Alex。記者發現Coco喺台灣呢兩日，有一個高大有型嘅男士陪食飯陪唱K，果然不愁寂寞。
上周五李玟做完宣傳返酒店，冇耐男伴就入咗佢嘅十五樓房間，之後一齊去華西街夜市食海鮮，Coco全程同男伴保持距離，又成日要家姐Nancy夾喺中間做擋箭牌，好似好驚俾人知咁，食完飯之後佢哋重去咗唱K唱到凌晨兩點幾，跟住一齊返酒店。
前日傍晚Coco搭飛機嚟香港，呢個男士都同佢一齊，記者上前八完知道佢叫做阿Wing，澳洲籍，護照登記名係AlexanderLui，見到記者影相，Coco好緊張咁嗌唔好影，重話佢只係家姐嘅男友，因為自己行李多，叫佢幫手攞。
夜晚九點幾，李玟同阿Wing到咗香港機場，兩個前後腳出閘，扮到唔識咁，去到停車場先開始傾偈，跟住佢兩個去咗中環干德道半山明珠臺。又話係家姐嘅男友，點解又唔見家姐一齊嚟嘅？
英皇新人梁洛施（Isabella）噚日去咗鑽石山荷里活廣場，出席港台義賣糭活動，佢着咗條短裙嚟，大騷玉腿，當佢喺台上跳舞時，轉身時重露出打底褲，非常吸引。Isabella表示有留意師兄Boy'Z嘅Steven被雪藏新聞，佢話：「不過我唔信公司雪Steven。」
張震嶽前晚喺台灣新莊舉行一連兩晚嘅演唱會，喺綵排嗰陣，佢嘅手機突然響起，張震嶽不改其直率風格，即衝口而出大鬧：「幹×娘××！」搞到台下採訪嘅記者非常尷尬，不過佢女友路嘉怡同好友張震都不以為意，似乎非常習慣，還笑住叫佢加油。
幾米控告台語歌后江蕙嘅國語歌《晚婚》嘅MV內容，抄襲佢嘅作品《向左走．向右走》，前日喺台灣被判敗訴，而執導該首歌MV嘅鄺盛，啱啱攞咗金曲獎嘅最佳MV導演獎，佢話幾米成日以為自己嘅嘢最得，根本藝術就係好主觀嘅，佢又話唔明幾米做乜要打官司，重寸幾米話「他應該不缺錢」。
羅國維日前因癌病逝世，佢嘅遺孀殷巧兒同仔女喺北角香港殯儀館幫佢設靈，今日出殯後遺體會送去歌連臣角火葬場進行火化。羅國維生前信咗天主教，聖名叫若望，佢個仔重已幫羅國維添咗兩名乖孫，而噚日曾江同范徐麗泰亦有去香港殯儀館致哀。
