美國前總統列根不幸逝世，自由世界少咗一位偉大慈愛嘅父親！
列根在任時，不但創造美國經濟空前繁榮，美國好，香港好，香港亦進入空前嘅繁榮年代，列根連同戴卓爾夫人，更聯手將萬惡嘅共產主義帝國集團，基本上埋葬，雖然重有少少鞭長莫及嘅手尾未清，但解放蘇聯東歐，薄海歡騰，經已功照千古！
若然唔係有列根呢位大阿哥，喺八十年代鎮懾住全世界，中國嘅鄧小平，亦唔會受到腦震盪，喺事實及真理面前乖乖低頭，准許香港九七之後「資本主義制度五十年不變」，所以飲水要思源，列根總統有恩於香港，佢老人家逝世，特區政府應該下半旗哀悼三日至啱！
唔知係咪大人物崩殂，會干擾氣候磁場，搞到連特區呢邊，都有啲人失言亂噏嘢，例如財政司司長唐英年，率領工商代表團，北上視察東三省，喺見曾慶紅同唐家璇之前，唔知點解，佢竟然跟人口水對記者話，東三省國企嘅呆壞帳問題多多，想喺嗰度投資，要諗清楚！
唐唐公然潑冷水，梗係唔止因為列根逝世、悲傷過度而受刺激有關。有政界消息人士語告八方：若果心水清嘅，望多一眼，就會清楚所謂投資東北，係由國務院廖暉扯頭纜，國務院隸屬溫家寶，而胡溫對於香港，係人都知冇乜話事權，只有點頭講Yes嘅責任。
六四之前，由廣東省阿頭張德江率領嘅「九加二泛珠角論壇」，就好唔同，張書記係我哋江總親密戰友，泛珠角嗰條邊界，拉到去四川同湖北冇雷公咁遠，呢一樣，同去年流傳嘅胡溫想重點發展珠三角（當時冇咗個「泛」字）嚟平衡番上海長三角嘅大勢，有少少唔同。
香港嘅工商界，計埋聲氣多多嘅朗尼陳，個個都係做地產。前兩年當奴帶團，話投資大西北，𡁻完一輪哈密瓜就冇晒下文。𠵱家突然又標咗個大東北，同埋泛珠角，即是全國都有迫切嘅需要，想特區工商界揼水投資。
究竟係大西北正，定係東三省靚，定係四川湖北貴州江西等泛珠角妙？香港嘅億萬富豪，炒炒埋埋得嗰不外二三十個，佢哋近年喺大陸嘅「投資」紀錄，重點似乎係起高爾夫球場。又大西北、又東三省、又珠三角，唔睇清楚邊一忽田，歸由中央邊一瓣勢力認頭，啲水亂咁揼，好易揼出禍。
都係唐唐醒目，見唐家璇等人之前，就嗱嗱聲向工商界準備喺東三省大展拳腳開發高爾夫球場嘅愛國熱情潑冷水降溫，經佢一提醒，原來東北嗰邊咁多呆壞帳，大家去到長春都係唱一輪卡拉OK、哈哈哈乾笑幾聲應酬吓算數。
唐唐始終係第三屆特首最有力人物，佢今次咁識落注，就顯示出