未來個多月，新股市場將好活躍，排隊上市的已有十多家，當中更不乏集資逾百億的重磅股，例如中海集運（2866）、和記國電同平安保險等，中集同平保聲勢浩大，勢會掀起認購熱潮。通常有大型國企上市，大市多會造好配合，相信今次亦唔會例外。
正進行IPO的中集，已引入好多「大孖沙」策略性股東，包括長實（001）、李兆基同周大福等。中集上市條件幾吸引，發售24.2億股，5%IPO（最多回撥到20%），招股價3.175元至4.175元，PE約6.5至8.5倍，估計上市後股價會有30%至40%升幅。中集上市後市值約250億元，將係國指10大成份股之一。
講番個市，低位有支持，上周五升番92點，成交就縮到89億元，暫時都係整固緊，成交少，關係唔大。個人偏向略為看好，望上去，有兩個阻力，係50日線（12125）同近期高位（約12250）水平，一衝破，升勢就可確認，初步目標係12700，至於複式頭肩底的上升目標就去到13500。
國指亦有形成頭肩底之勢，頸線係4400。若如所料，國企重磅新股會帶旺個市，國指有機會破位而上，並確認新升浪開始，下半年目標5300。不過，油價大上大落，宏調又進行緊，國企後市雖可看好，但表現會相當波動。
二三線股有好多都由低位大幅回升，俊和集團（711）就升穿2月高位1.4元開始的下降軌，正做緊旗形整固，一升破50日線（0.86元）阻力，照度上去，目標係1.2元。
俊和2月時升勢好急，主要係美聯物業（1200）入股，美聯除獲得俊和大股東割愛外，更數度在市場大手扯吸，已持有逾1成股份，入股價平均約1元，投資者家下上車，有着數。
美聯睇中俊和，梗有智珠在握，最近兩幅官地賣得高價，俊和更加有寶。俊和除建築業務外（手頭合約成80億元），又擁有彩虹地鐵站上蓋的住宅項目，樓面22萬方呎，另有10萬方呎的商場同停車場，聽聞下月發售，早前估計過，單係呢個項目，獲利可達10億元，即每股俊和賺1.38元。今個月中，九龍城一幅勾地若賣得好價，水漲船高，俊和賺得重多。
郭兆誠