精明消費：<br>開瓶器搞搞震美女裙底幫你開酒
<br>精明消費：
開瓶器搞搞震美女裙底幫你開酒
近年有不少報告指出，每日飲少量紅酒有助身體健康，因而許多人都成為了紅酒專家。市面亦紛紛推出了不同花款的開瓶器，無論外形或功能都大有改善，所以今日就索性為大家介紹各款開瓶器，即使你不好紅酒，也可以選購一些用來開啤酒或汽水蓋的開瓶器，花款設計同樣過癮！
記者：張銘恩
攝影：蔡鴻雯、陳智良、林栢鈞
模特兒：Wendy
開木酒塞玩高科技
適量飲酒與生活品味經常扯上關係，無他，因為一支好酒絕對可以價值連城，連隨其開瓶器亦可以是由名師設計，又或是一些高科技的結晶品！
過癮之作：美女裙底開酒器
意大利Alessi出品，單睇外形已經贏晒。只要將其裙底的螺旋軸插入酒塞之上，然後轉動她的冬菇頭，最後㩒低兩隻手仔，即可享用香噴噴美酒。裙身的顏色更備有粉藍色、黃色及黑色，你又鍾意邊隻色？
售價：$500(a)
豪華金裝
德國孖人牌全金色開瓶器，細細個夠精緻，金碧輝煌啱晒豪氣之人。咪睇佢咁靚以為得個樣，孖人牌出名鋼水好，絕對耐用。
售價：$555(b)
有型Design
丹麥出產全不銹鋼開瓶器，由設計師BentFalk操刀，頂部U形小橋有利轉動，外形簡約有型。
售價：$450(c)
女士最啱：刺針式夠慳力
Corky刺針式開瓶器，瑞士製造，利用氣壓原理抽出木塞。首先將刺針插入木塞，然後來回擠壓手柄泵氣入瓶內，直至木塞被擠出，頗慳力，女士啱用。
售價：$145(b)
鎖匙開瓶
Alessi鎖匙形開瓶器，意大利製造，繽紛色彩最為搶眼，雖然價錢較貴，但搞鬼設計及用料都值回票價。
售價：$735(a)
開汽水蓋花款可愛
老實說，開啟汽水、啤酒蓋用的開瓶器，功能單一，實在無啥特別。之不過在這個講包裝、講花臣的年代，縱使是平凡之物，只要經過悉心設計，也會有麻雀變鳳凰的氣勢。最佳例子有以下六款開瓶器，換上可愛得意的造型後，不但有實際作用，同時更肩負美化家居、展現品味的偉大使命。
體積迷你戶外適用
德國三叉牌迷你開瓶器，採用頂級18/10不銹鋼製造，使用時只要將蓋子打開，直接插進瓶口與木塞間之隙縫，再用力旋轉一周後，即可將木塞輕易抽出，體積迷你方便野餐露營時使用。
售價：$108(e)
靚款推介：鋼嘴鸚鵡
別以為鸚鵡識得跟人講句Hello就好巴閉，此鸚鵡不但有裝飾作用，重識得用佢個不銹鋼嘴，幫主人擔走啤酒蓋、汽水蓋，真正的鸚鵡睇怕都要甘拜下風。
售價：$90(a)
鯊魚尾好好揸
鯊魚鰭就話可以做魚翅啫，鯊魚尾相信都無乜作為啩？不過世事無絕對，好似呢隻鯊魚尾咁，雖則不能食落口，但卻可以幫你開啟汽水蓋又或蠔油蓋，使用時揸上手好舒服，都算得上功德無量啦！
售價：$45/個(a)
經常沖洗不生銹
呢隻肥嘟嘟的甲蟲仔唔係標本，其真正身份是用來開啟汽水蓋用的開瓶器。顏色有橙又有藍，以不銹鋼製造的開瓶口位，夠實淨耐用之餘，經常沖洗也不怕生銹褪色。
售價：$65/個(a)
多用途夠方便
別以為開瓶器不過是用來開啟瓶蓋之用，在這個講求效率的年代，就連開瓶器也要自我增值，提升功能，成為多用途的器具。好像化身成樽口塞，以便用來儲存剩餘的有汽飲料，又或者加強效用，除了開汽水蓋，並可開啟不同種類的瓶蓋。
得意開心鬼
笑到陳四萬咁口的開心鬼，個大口最啱用來開汽水蓋，令人睇得開心之餘，用起來重特別得心應手。共有紅、黃、藍三色可選，方便配襯不同色系的廚房。
售價：$145/個(a)
大人國開瓶器
ExtraLarge出品，全金屬製，名副其實特別巨型，不過唔使擔心，真正用來開汽水的位置是在尾部，絕對適合你我正常人使用。
售價：$108(d)
幫手封口
瑞士設計公司Simplicitas出品，全不銹鋼用料，表面加工帶點磨砂，用〝減〞那邊可以開樽蓋，飲唔晒更可以用〝加〞那邊重新封口，幾實用。
售價：$490(c)
專業大廚級
美國Anolon一向是受專業廚師歡迎的品牌，此開瓶器上部份可開啤酒瓶蓋，下半部就可開木塞蓋。質料堅硬，手柄位更特設軟膠，令用者能揸得更舒服。
售價：$139(b)
四用抵買：四合一多功能
超好用！兩邊頭合共可開啟四種瓶蓋，包括罐裝汽水拉環、啤酒樽蓋、膠樽蓋及撬鬆果醬樽蓋。德國製造，十分抵買。
售價：$39(b)
售賣點
(a)ColourLiving22956881
(b)西田百貨26941111
(c)E'zDesign34282036
(d)ASAP28080847
(e)崇光百貨28338338
(f)FrancFranc34273366
(g)吉之島十元店34282138
便攜式萬用刀
白色可摺式萬用刀，可開啤酒蓋、木塞，還附有小刀仔，便攜式方便隨身帶住，乃去Camp之寶。
售價：$48(f)
儲存開蓋一體化
買了大大支啤酒回家，呷上幾口已覺一肚子氣，嫌倒掉太浪費，建議不妨使用這個兼具樽口塞功能的開瓶器。儲存剩餘的啤酒便不會「走氣」，平時又可作開瓶器使用。
售價：$10(g)