阿飛怒炒全國人大魷魚已成定局，雖然祖國未通知佢要做乜嘢手續，飛哥都唔理得咁多。咁又係，過往只會幾千人爭住打崩頭想做人大代表，幾何有人會好似飛哥咁因為頂班老共同土共唔順，自願請辭，即是嫌國家嘅名譽蓋腥，你話幾有性格。
大飛一走，人大又有空缺，有人笑中大醫學院矯形外科及創傷學講座教授梁秉中今次又有機會執二攤，因為上一屆，佢都係候補上位，上次因為廖烈科在任期內病逝。
八方問梁教授係咪又做人大，佢笑而不語，話自己一切隨緣，有得做同冇得做一樣開心。香港人一定唔會忘記中大醫學院同威院嘅醫生，舊年沙士期間，佢哋不怕同當局甚至同中方對着幹，梁教授更親自帶記者上廣州，證明真係有「怪病」，叫港人不可掉以輕心，咁做有冇得罪中國，畀佢填大飛個位？冇人敢包喎。
其實梁教授想做人大，完全因為佢知道，喺大陸如果要做啲慈善嘅實事，為殘障人士做義務手術，有全國人大代表嘅身份，會派少好多片，做嘢易好多，權力對於佢，冇乜意思。
傳真︰2623-9278
電郵︰