老友噚日叫趙飛雲入馬場，但因為見到早兩個賽馬日幾乎場場都有啲無厘頭馬跑出嚟，完全冇得賭，所以決定罷賭馬一日，點知噚日又連場正路馬得手，老友滿載而歸請趙飛雲出街食飯，見面第一句又係問今日個市點睇？
趙飛雲預咗佢問呢個問題，一早帶定張油價走勢圖出嚟，老友睇完之後即時叫好─好在張油價走勢圖夠肉酸。
美國上周五公布的就業數據強勁，6月尾加息1/4厘似乎冇走雞，但上周五美股不跌反升，主要由於油價似乎跌勢已成，熱錢將撤出及流入其他市場，股市必然受惠，這可能亦是美股近期在利淡消息下反而緩步上升的原因。
上周五杜指升至10302受阻回頭，收10242，升46點。技術上，杜指仍未重返50日線（現處10252）之上收市。50日線及保歷加通道頂（現處10309）是杜指短期的主要阻力區；若能確認突破，會進一步上試10500水平。
港股上周四大跌271點後，上周五回升92點，恒指收12203。今日如無突發消息，恒指頗大機會在50日線12125至10日線11949範圍內窄幅上落，等待美股走勢啟示才作向上或向下突破。如無意外，相信港美股市會隨着油價下滑得到上升動力。
周初以觀望為主，若新地（016）再回試63元不破，會買齊餘下2000股尾數。
趙飛雲