𠵱家世界難撈，有好多人都諗住北上闖一番事業，連大地產商恒隆地產嘅第三代，都話要返大陸睇吓有冇發展機會，到底此話何來呢？話說八方噚日喺一個午餐會上見到恒隆地產主席陳啟宗，佢話佢個寶貝仔啱啱喺幾個禮拜前大學畢業，話見到內地個勢咁好，想返去大陸做嘢喎！
早已喺內地擁有眾多投資嘅陳啟宗，當然唔會反對個仔返大陸闖一闖，但佢就提醒個仔唔好諗好似北京同上海嘅大城市，因為全國嘅精英經已雲集喺兩地，競爭實在太大，佢建議個仔可以去西邊嘅城市碰碰運氣，賺錢機會較高咁話喎！連教仔都不失陳氏一向穩陣嘅風格。
席間又有人大讚陳啟宗，又係兩間上市公司董事長，又係多個關心國事之組織嘅成員，重要身兼數個協會及大學之要職，認真係犀飛利。不過，平時斯斯文文嘅陳啟宗突然爆咗一句：「都係龍船裝屎啫！」。呢句嘢點解呢？佢自己就解釋：「咪係又長又臭囉！」。
傳真︰2623-9278
電郵︰