李柱銘要空降九龍東，搞到民主派協調工作天下大亂，八方聽聞民主黨九東同港島支部班基層黨員怨聲四起，有人重話想退黨咁大件事，外界將矛頭直指馬丁唔想排第二，跟楊森尾排一條隊選，但八方卻聽到故事另一版本。
其實早喺華叔唔選未曝光前，馬丁已私下同老友講想去九東頂華叔個位，但俾楊森同李永達反對，加埋當時有人同負責協調嘅朱耀明講，民主派喺港島可以搶五席，結果就搞咗個冒進「五條煙」方案，當時馬丁已同八方講，若果佢同楊森一條隊，楊森一定排第一，因為黨主席唔輸得。
點知最近民主派喺港島做民調，做嚟做去都無五席，於是有人建議「五條煙」走一個，但兩大狀情願唔選都唔肯走，江湖傳聞何秀蘭、鄭家富拉埋馬丁度咗一輪，之後李柱銘去九東嘅方案就重新「復活」。
噚日九東再開武林大會，連封咪嘅大班都俾民主派搬埋出山，想說服九東其他民主派，好似陶君行咁接受馬丁空降，𠵱家民主派會做民調，希望證明馬丁落九東可以大幅增加民主黨得票，並且藉民調勸退陶君行、廖成利其中一個。有民主黨地區人士好勞氣同八方講，其實最好係梁家傑去九東，地區兄弟「貼埋大床」幫佢都肯，一係叫何秀蘭轉區，為乜次次要搵民主黨地區「開刀」？有人重好唔順咁講：「嬲嬲哋真係勸華叔出番嚟選好過！」
（圖）李柱銘（圖）空降九龍東，連大班都搬埋出嚟解畫。
傳真︰2623-9278
電郵︰