煲碟王:奧斯卡猛片《懸河殺機》<br>三猛男演技大角力

煲碟王:奧斯卡猛片《懸河殺機》
三猛男演技大角力

呢個星期新返嘅幾隻DVD影碟中,最值得注意都要數劇情片《懸河殺機》,雖然欠缺千萬特技畫面,但憑着劇中演員精湛嘅演出,戲味濃厚,獲得唔少獎項,劇中追尋真兇時線索疑幻疑真,更令人睇得特別投入緊張,睇慣打打殺殺嘅動作片,轉吓口味,《懸河殺機》會係一個唔錯選擇。

記者:許福合

其實《懸河殺機》一片已經先後獲得多個電影獎項,而喺最近嘅奧斯卡中,曾經被4次提名最佳男主角嘅辛潘,終於一償心願,憑《懸》片中出色演出,奪得最佳男主角一獎,令《懸》對影迷更加有吸引力。

■辛潘終於一償心願,憑《懸》片奪得最佳男主角。

小說改編故事緊湊
好戲當然要有好劇本,《懸》故事根據DennisLehane同名小說改編而成,劇中故事發展緊湊,能唔能夠發揮原著本色就要睇導演功力,《懸》片導演都屬猛人,奇連伊士活是也,整體上戲中前三分一用嚟鋪排故事發展,而後半則屬戲中精髓,劇情亦較為緊密,對未睇過故事大綱嘅人,要喺頭30分鐘跟住故事就唔係咁容易,不過稍後睇落就會自自然然明瞭前半部故事,所以要睇此片,奉勸各位先做好身邊瑣事坐定定睇,免得浪費一套好片。



兒時悲劇成導火線
至於故事發展,一開始就由劇中三名主角占美(辛潘飾)、戴夫(添羅賓斯飾)及桑(奇雲貝根飾)講起,三人經常喺街邊留連,一日戴夫被拐帶侵犯,逃出後一直認為占美同桑沒有盡力救他,三人關係日漸疏遠,直至25年後,占美大女兒姬蒂被謀殺,占美誓言報復,而桑剛好係調查此案嘅警探,戴夫更因為曾受傷成為頭號嫌疑犯,甚至不獲妻子信任。占美不顧友情報仇,而桑則不斷努力調查,最後占美能否成功報仇,而真兇又是誰呢?

■全片皆屬文片,欠缺動作打鬥。

■占美同桑可謂一黑一白,一個曾坐監,一個就係幹探。

■桑成為一名幹探,負責調查占美女兒被殺一案。



演技比拼最為吸引
《懸》一片雖然改編自小說,不過故事內容無乜突出之處,睇咗大半都應該估到真兇誰屬,所以唔應該以偵探片角度來睇此片,反之《懸》片最值得欣賞都數到三名男主角實力派嘅演技,最佳男主角辛潘自然毋容置疑,即使添羅賓斯同奇雲貝根亦有唔錯發揮,尤其飾演戴夫嘅添羅賓斯絕對可媲美辛潘,劇中戴夫因為兒時遭遇,表情行為都有啲異常,難度甚至比占美一角還要高,所以即使轉換角度,以欣賞演技嘅心態看此片,亦有一番味道。

■戴夫一日被拐帶離開,開始悲劇一生。

■三人小時候經常一齊喺街頭玩樂。

■女兒不見了,占美當然大為緊張。

■戴夫被嫌疑,桑找他問話。

■呢支槍就係全片關鍵所在。

■知道女兒被殺後,占美當然激動萬分。

特別收錄
《懸》片DVD內嘅特別收錄唔多,只有一些包括辛潘在內嘅訪問,想知道多啲《懸》片拍攝「內幕」,就絕唔可以錯過。

■特別收錄內容唔多,主要係訪問,都值得一看。