近日喺洛杉磯搞咗個名為「荷李活100」嘅慈善拍賣，由荷李活名人捐出一百件物品供大家競投，籌得嘅款項會捐畀慈善組織「ProjectAngelFood」，用嚟提供免費食物畀愛滋病人同殘疾人士。
今次嘅一百件拍賣品之中，最矚目嘅相信喺去柏林探湯告魯斯（TomCruise）班，睇佢點拍《職業特工隊》第三集，而且重可以同靚佬湯一齊食餐晏仔，另外亦包埋當地高級酒店三晚住宿，聽落真係幾吸引，不過底價都已經成一萬二千五百美元（約九萬七千五百港元），睇嚟我羅拉都係得個恨字。
而其他比較經濟啲嘅拍賣品，就有同莎朗史東（SharonStone）食晏，佢重會送埋香吻，底價都係一千五百美元（約一萬一千七百港元），同一個底價嘅重有去拉斯維加斯睇大衞高柏飛（DavidCopperfield）表演，重可以同大衞去佢嘅魔術博物館度睇珍藏，大衞亦會送出兩晚酒店住宿㖭。
另外艾頓莊（EltonJohn）張簽名鋼琴櫈、湯漢斯（TomHanks）嘅結他以及查理絲泰朗（CharlizeTheron）喺《天羅盜網》揸過嘅MiniCooper亦係其中嘅拍賣品。