黃秋生同孟廣美以前已經傳過緋聞，俾人發現佢哋一齊行街買書，前日秋生又俾台灣傳媒撞到佢同孟廣美一齊喺西門町行街，當時秋生戴住墨鏡，喺人群中特別搶眼，而身邊嘅女仔就好修長，兩人都着住藍色T恤牛仔褲，有講有笑好自在，台灣記者上前想睇真啲女仔個樣，但係個女仔就好機警咁即刻行開，不過個記者話女仔嘅外型睇落真係好似孟廣美。
之前佢哋傳出緋聞嗰陣，孟廣美話同秋生只係好朋友，大家冇曖昧關係。台灣記者想證實個女仔係咪孟廣美，但係就一路打唔通佢嘅手機，孟廣美嘅經理人方登愷初時同記者講話孟廣美喺內地，但知道記者撞到佢喺台灣之後，就改口話再打畀佢問吓。
不過孟廣美嘅經理人就強調話孟廣美同秋生只不過係普通朋友，而且孟同意大利籍男友感情好好，就算真係同秋生出街，都只係普通朋友食飯喎。
馮仁昭噚日都搵過秋生，睇吓件事係咪真，不過秋生嘅手機一直飛去留言，搵唔到佢。
周麗淇噚日去咗銅鑼灣世貿中心，出席「夏日變身大行動」，佢話因為近年興復古，所以佢會好好保存阿媽啲衫。
周麗淇話：「不過我阿媽係肥妹一名，而且又有甲組腳，所以我一定要攞晒佢啲衫去修改一下。」
劉青雲噚日到尖沙嘴出席《絕世好賓》慶功宴，監製爾冬陞都有出席。對於開戲畀楊千嬅而諗住搵容祖兒做配角，爾冬陞話祖兒只係考慮人選，𠵱家俾人寫出嚟佢要同祖兒講唔好意思。青雲就話爾冬陞話要同佢道歉，因為《新不了情》同《忘不了》都冇辦法幫佢攞影帝。
無綫早排將《勁歌》季選改做優秀選，唔出席就冇獎呢個規矩就係歌手都知，身為樂壇一哥嘅學友就梗係有說話講，但被無綫力捧嘅李克勤就以身體力行支持無綫，噚日克勤出席金鐘舉行嘅無國界醫生宣傳活動時話：「多年嚟一直都有呢個問題，不過家有家規國有國法，參加呢個遊戲就要接受遊戲規則，我就每年都會盡量抽空出席。」
有份負責電影《2046》字幕工作嘅魏紹恩，日前喺周刊嘅專欄上話康城頒獎禮當日，梁朝偉好心急打電話問電影公司嘅人，究竟女友劉嘉玲使唔使set頭去頒獎禮，事實上係偉仔想知自己個影帝有冇着落。佢重爆原來《2046》喺康城首映嗰晚，最後兩份拷貝喺電影播放途中先至由電單車騎警送到去會場，有意外咪分分鐘睇唔到個尾？
Ba叔近期力捧嘅新人侯莎莎噚日喺尖沙嘴舉行嘅「我要做Model人氣大募集」活動上擔任評判，司儀問侯莎莎有啲乜嘢心得可以提供畀啲參賽者，佢就答：「月經就月經！」大家聽完都𢱑晒頭，後來先知佢嘅意思係愈驚就愈驚，唔怪之得廣東話唔正嘅Ba叔咁睇得起呢位新人，原來係大家口音相近，同聲同氣！
王從希噚日以性感打扮去九龍城行catwalk，佢話自己選港姐都差唔多成年，自己亦都有成年冇探過多倫多嘅家人，所以佢好想快啲放假探親。對於今年嘅港姐，王從希話佢自己都有留意，其中2號余妍慧更係佢嘅朋友，所以佢就梗係睇好佢啦，至於有指18號黃綺雯疑隆胸，佢雖然有睇過報道，但就覺得可能係件泳衣問題啫。
台灣小天后張韶涵日前喺台灣舉行佢嘅新書《奇蹟的安琪拉》記者會，黃子佼同許紹洋等唔止帶咗個美女出浴嘅蛋糕送畀佢，而且重帶咗啲滷味同鮮花送畀佢㖭，啲滷味亦令張韶涵回憶起自己初初喺加拿大返到台灣，要坐喺街頭食滷味嘅日子，可以話係意義重大。
