吳家樂手車安唔安全我唔知，不過可以肯定佢係個愛快之人，聽佢揸過嘅每一部都係跑車就知啦！佢重講每個月總有三幾天都會同一班車迷「遊車河」，但地點時間就要保密。索性問佢會唔會揸快車，佢答話：「喺遵守交通規則下，我都會揸快少少。」好難想像當佢揸住架NSX又或者係改裝過嘅平治C32時，佢要喺唔超速嘅情況下「揸快少少」，已經好乖仔㗎啦！
記者：曾順珍 攝影：陳偉強
約了吳家樂早上九時做訪問，他大汗叠細汗的出現，座駕平治C32則泊在馬路旁，雖然我在電話裏早已表明來意（跟他做專訪），但他仍對自己未能幫手試新車感到失望，一再叮囑我下次要預他的份兒。
「最緊要影得我架車靚就得……要我坐地下影相都無問題㗎！」二話不說便立即坐在熱氣騰騰的地上俾攝影師任影唔嬲。
吳家樂話自己買車都有個條件，就是「象徵式」要有4個位，車廂要夠大，可放得下他的物件，如高爾夫球棍、波衫等，當然現在的C32就切合以上的條件。
「我呢架車係原廠改裝，強化咗車底，加咗AMG大包圍、尾翼、SwayBar（防側傾穩定桿），換咗18吋AMG胎軨、超白光頭燈等，有354匹馬力，排氣量3200cc，喺香港好少見到。我最初都有考慮買寶馬M3，但因為難買保險，所以就出咗部C32。」
可能因為在港較少有，所以有次行經屯門公路時，交警把吳家樂的車截停，懷疑他非法改裝車輛，氣得他七孔生煙。
打從19歲起，吳家樂便擁有自己的座駕，最初的兩部是Civic，接着是Celica、富士WRX、寶馬325i、AcuraNSX、平治C32，每一部車給他的感覺都不同。例如他的駕車技術全都是揸Civic學來的；Celica好型但就壞得最多，試過在隧道內「跪低」、Overheat好多次，所以由原本好鍾意變成好憎。到WRX就令他好失望，因為他以40多萬買回來，但揸了半年後，富士居然推出一系列平價車自己打自己，於是便趁未大跌價前以25萬賣出去，那回他蝕了很多；寶馬就最好揸，一揸便是6年，雖是自動波，但波箱反應快，有點揸棍波感覺；而NSX則是自小的DreamCar，因為NSX的會長幫手找到一架直版無撞過的NSX，於是便斥資40幾萬出了一部二手NSX，但後來因為911及謝霆鋒事件變得難買保險，在好唔捨得的情況下惟有賣掉。
引擎：3,199c.c.V6SOHC加Kompressor增壓器
馬力：354ps/6100rpm
扭力：45.9kgm/4400rpm
傳動：5前速Speedshift半自動排檔
懸掛：（前）三連桿式（後）多連桿式
尺碼：4535×1730×1410mm
0-100公里：5.2秒
極速：250km/h
車價：約70萬
NSX之後，吳家樂的DreamCar是波子Turbo，因為貪佢可以作日常代步又易操控。
「有兩種車我一定唔會買，第一係開篷車，因為我覺得危險，萬一發生意外時，篷頂會好易壓爛，又好容易拋出車外；另外四驅車亦唔會考慮，因為香港有好多停車場的樓底都未必夠高畀四驅車駛入，如果要買四驅，我倒不如買架Alphard，呢類七人車方便好用而且放得好多嘢！」
問他為甚麼不玩賽車，他說曾有朋友叫他去珠海賽車，亦曾想過買一架小型賽車放在珠海，待有時間便上去玩，但因為實在太忙不能抽身，如果一個月玩不到一次就唔抵，所以最後他都是打消賽車念頭。
「揸快車要講經驗同膽量，如果係十年前我一定會去賽車，但𠵱家我情願踢波，因為𠵱家我較重視家庭同事業，最多會跟一班車迷每月搞4、5次「遊車河」聚會，可能因為曾經試過墮馬嘅經驗，令我知道若果發生啲咩意外，所有嘅工作都要停落嚟，對處於搏殺期嘅我好有影響。」睇嚟「家樂仔」愈嚟愈成熟。
