新一代笑匠鄭中基扮女人堪稱一絕，但他坦言已感厭倦，如非必要都不想再扮，雖然電影成績理想，但其終極目標始終是在紅館舉行個唱。談到兒女私情，鄭中基表示要拜多四次年才肯結婚，至於對象是否楊千嬅，則是不言而喻。
鄭中基近年電影成績突出，躋身千萬票房男星之列，又被封為新一代笑匠，似乎在影圈一片光明，不過他聲言始終對唱歌興趣較大，所以當他完成手頭上的片約後，便會專注錄音和籌備個人演唱會。
鄭中基的新片《我要做Model》上映在即，能否延續《龍咁威2003》的一千六百萬票房佳績仍是未知之數，他日前說：「上次大家乜都唔知，冇期望就冇壓力，但今次壓力好大，希望就算好唔過上次，都要打平，點都唔好差過上次啦。呢個情況好似考完試等派成績表，好緊張。」
鄭中基憑扮女人出位，他表示在《我》片中並沒扮女人，只是造型誇張才被誤會，他說：「今次做我最唔拿手嗰樣──扮model，我最唔鍾意影相同擺pose，導演話就係要我扮得唔似先好笑喎，個角色係世界topmodel，自以為放乜上身都係最靚，咪搞到造型咁誇張囉。」鄭中基自言已厭倦扮女人，以後若非必要，他不會再扮。
至於在即將開拍的馬偉豪新片中，有一幕他要穿女人衣服，鄭中基說：「重有詳細嘢未傾，嗰場戲未必一定要拍。其實我頭幾次扮女人都係咁啱需要，嗰陣冇話唔鍾意，但𠵱家真係扮得太多，都冇新鮮感啦。我重有好多好笑招數，唔一定要扮女人。」
至於音樂方面，原本今年十月舉行演唱會的鄭中基，決定將個唱延期至明年三月。問他可會心急？他笑說：「就係唔心急先延遲，我廣東歌真係唔夠，唔通唱晒國語歌咩？第一次我要做好啲，要完全以音樂為主，唔通我換十套衫你會覺得好睇咩？等我出多兩張廣東碟就差唔多。」
