港股噚日歸於平淡，哈啤（249）收購戰告終，空軍無進一步發難，蒙牛（2319）截止招股，中海集運（2866）首日公開發售認購未見踴躍。恒指雖隨美國場外期指回升92點，收12022，但成交縮至不足90億元，據聞同認購新股有關。雖然噚日有消息話認購蒙牛孖展客縮沙，但認購倍數仍接近百倍，大量資金被凍結，而芬佬及本地華資亦要預留資金應酬中海集運。
聯想（992）出完業績不斷被大行唱淡，叫客沽貨，其實早前唔少大行已叫客減持。聯想周四跌至2.15元後，似乎已搵到支持，噚日有大量買盤入市博反彈，成交達1億元，股價就冇起跌。其實聯想博反彈風險幾高，因為大行不約而同睇淡聯想增長前景，國內市場份額會漸漸被外商蠶食，海外市場又唔易有突破。加上外資最近集中炒國企，少炒紅籌，除非佢好似哈啤（249）成為外資眼中的皇帝女，否則幾難炒得起。
老虎科技（8046）周三由17仙大跌77.6%至3.8仙，當日成交額只得257萬元左右，其後連續兩日反彈，昨收7仙，股價由低位反彈近倍。老虎科技噚日成交大增至1137萬元，但仍冇足夠動力將股價推高至接近17仙水平，看來沽壓唔小。公司澄清大股東兼前主席胡棟良並無將股份抵押，但可能會減持，相信現任主席李海柱會伺機增持。
華德豐（297）下周一正式改名，股份簡稱為中化香港。有消息話會炒高賀佢改名，噚日股價急升14%至0.325元。黑客話，華德豐連名都改埋，大股東冇理由任佢繼續做一隻殼股，點都會有業務或資產注入。
阿虎