新車速報：<br>OPELZAFIRASPORT歐寶7人巨跑

新車速報：
OPELZAFIRASPORT歐寶7人巨跑

以前，七人車無人會睇得上眼，全因為外形大而鈍又無款式可言，但今時唔同往日，七人車變得受歡迎之餘，為應市場要求，唔少車廠都會將旗下七人車逐少改裝或加入其他配套再增值，德國歐寶就係其一。最近車行就新鮮熱辣引入ZafiraSport，加咗原廠大包圍同Sport模式嘅版本，內外更添跑格，駕駛上亦有另一種新鮮感。

記者：黃婉冰　攝影：蔡鴻雯　ImageGirl：Wendy

轉Sport模式　上斜慳油
Sport版七人車會係點樣？原來真係可以有另一種效果，無論在行車表現或外形上，加入SportsPackage後的七人車，內內外外都可以畀你感受到其充滿Sporty一面。
論賣相，加裝一套原廠大包圍，將黑膠泵把改為噴油，令這部七人車更帶跑格，啱後生仔口味；性能方面，規格雖然同舊款一樣，但新增一個Sport模式，適用於高載客量或上斜時用，出動Sport模式，高負荷上斜時可保持高轉數轉波，避免有跳波的情形出現，行車時可做到慳油又順暢。坐上四個人後試了一轉，用上SportMode上斜，行車明顯有力同暢快，加上與房車一樣嘅軸距，操控或轉彎靈活度拍得住房車，唔睇外形，你會以為自己好似揸緊部轎房。

前衞內櫳　好跑格
車廂亦比預期中前衞，一部七人車居然配有一個望落有幾分似Momo賽車嘅三幅式真皮軚環，銀環表板、科幻Feel中控台，唔睇車身，確有幾分似跑車內櫳，對追求簡單、「夠用就算」嘅用家來說，中控台布局同設計會啱晒Channel，基本設備有齊，不多不少，簡單又易用，以19萬有找一部2200cc歐洲車來說，屬化算之選。

原廠包圍新跑Look

■電鍍鬼面罩加上與車身同一色系的頭尾泵把，齋睇個車頭重以為係部轎跑。

■七人車破格用上貓耳尾翼，前衞又有新鮮感！

前衞司機位

■要外形有跑味，點少得兩側裙腳？

■原廠包圍除了同一色系的頭尾泵把，下面呢個雙出式尾喉確實增加唔少跑味。

■估唔到七人車都會有個咁型嘅仿賽車軚環，附設軚環按鈕，方便就手。

■司機同乘客位改用更舒適的半桶形座椅，有姿勢亦有實際。

尾廂大變法

■按波棍上的S掣就會進入Sport模式。

■中控台簡單精緻，改以磨砂銀色配襯，充滿太空科幻味。

車廂其他熱賣點

■將中排座位抽起再向前推盡就可以將尾廂變大，空間大得可以用嚟瞓覺。

■一按頭枕旁的掣再一推，輕易就將後排座椅放低，女仔都可應付自如。

■後排座椅利用油壓式設計，只要大力一抽，座椅就可回復原狀。

■七座位車廂空間感不俗，起碼無侷促感。

■我最鍾意部車前前後後都有多個冷氣風口，加上已改用日本冷氣機。

■前排座椅旁各設有一個雜物兜，夠晒實用。

其他20萬有找七人車
本田Stream2.0
外形好家庭車嘅家庭車，雖然新款帶點跑味，但始終不太明顯，論後排座位及車廂的空間度來說則較Zafira遜色。 車價：$199,800

豐田Picnic
同為2000cc七人車，早前亦經過小改，最大賣點係車廂空間闊落、舒適，但在扭力方面，比起Zafira始終還是輸了一丁點，加上後者有Sport模式，行車選擇方面自然較優勝。
車價：$198,450

萬事得Premacy
走後生仔路線，車廂空間不及Zafira，雖然在各方面數值上都略為遜色，但勝在價錢夠平，近14萬價錢有架七人車，這點值得考慮。
車價：$139,900

OpelZafiraSport
引擎：2198cc直4DOHC
馬力：147ps/5800rpm
扭力：20.7kgm/4000rpm
傳動：4前速自動波
懸掛：（前）麥花臣（後）多連桿
制動：（前）透氣碟（後）實心碟
輪胎：195/65R15
尺碼：4317×1742×1682mm
軸距：2694mm
車輛提供：福方汽車（29888080）