油價回軟，期指再冇啲百厭盤搞搞震，港股昨日反彈，恒指回升92點，重上萬二點樓上。不過，是日交投90億銀唔到，人人等昨晚美國就業數據揭盅，唔敢郁手。成交咁細，大市雖升，意義不大。
啱啱提過嘅3件恒指Call輪，以9099最威，彈高22%，9773同9799則分別進帳8%同11%。炒恒指Call輪博反彈，昨日有利潤應先落袋，無謂冒險過周末。若見美國就業數據對辦，下周一追貨又點話，蝕章多少都冇計。
恒指受制於50日線成個禮拜，如果美國昨晚數據好，美股彈彈跳，港股就好有機會突破悶局，破關而上。到時除咗追買恒指Call輪，亦可以玩番多少中移動（941）Call輪。
中移動亦喺高位呆咗好幾日，大市若然向上，佢唔會點執輸。中移動Call輪揀定3件，正路之選係9813，玩到12月1日，溢價6.3%，槓桿率8.7倍。要刺激些少，揀9907，短1個月命，溢價9.1%，槓桿率10.7倍。想再刺激啲㖭，可炒9854，壽命同9907一樣，溢價11.7%，槓桿率13.6倍。
彩星（635）有件掛牌冇耐嘅公司輪1084，是日跳升20%，收報9仙，正股只係微升1仙咁大把。1084明年5月到期，溢價62.4%，槓桿率10倍都補唔番，行使價1.42元，正股現價不過93仙，咁嘅條件，買輪不如買正股。
章盛