香港地產建設近日決定，收租物業西貢竹洋路一零一號，Hilldon三座洋房，整批放售，意向價四千一萬，每呎六千。面積千八至三千呎，其中兩間連租約，租期至明年五月。
公司個名十足似政府機構，實質係私人公司，老闆大有來頭，係新加坡上市公司大眾控股主席兼董事經理周曾鍔，十年前喺西貢竹洋路買入三幅地皮，除Hilldon外，重有竹洋路九十五號樂居與九十九號龍嶺，前者早年由租轉賣，九間洋房賣剩兩間，套現四千萬，至於龍嶺八間屋就一直收租。
業主雖然喺西貢有咁多物業收租，不過作風相當低調，即使近年買賣壽臣山麒麟閣及中半山地利根德閣三複式等豪宅，也鮮為人知。
機鐵香港站摩天巨廈國際金融中心二期落成，另一座逾百層嘅高廈九龍站五至七期，最近批出建築圖則。蘭西噚日見到土地註冊處有幾宗呢個項目轉手紀錄，由地鐵賣畀三間公司，共值逾二十八億。原來三間都係中標財團新地嘅附屬公司。
交易包括第五期酒店一點三巴仙權益，作價兩億六；第七期二點七巴仙酒店權益，值五億五；至於第六與七期九點六巴仙商廈權益，值二十億。
蘭西向投到九龍站五至七期嘅新地求證，得到回覆話轉讓權益目的，係為方便長線投資與租務需要，冇乜特別咁話，即係純粹改名嘅問題。地鐵方面補充，係同新地純商業安排喎。
代理高層買發展商新盤嘅消息沉寂一輪之後，近日又有兩個美聯董事級人馬，先後買入鴨脷洲深灣軒單位，中西半山區域營業董事馮劍釗，買入三座低層A室，六五五呎，成交價大約四百萬，每呎六千一。
佢話，自己賣樓賣得太投入，所以就買咗間長線投資，日後推銷呢個樓盤，會更加有說服力，重話二按優惠好吸引，驚發展商隨時取消。佢搵埋拍檔山頂南區豪宅助理營業董事楊永健一齊買。住開嗰區嘅街坊楊永健，與馮劍釗買埋同座中層A單位，樓價都係四百萬左右，相信買嚟自住居多。
上個月樓市偏靜，代理行生意減少，梗係希望今個月做番多啲補數，但係焦點新盤馬灣珀麗灣遲遲未開賣，凍結唔少購買力，香港置業九龍區為打破困局，新增「千足金桶大激賞」獎項，全區二十三組員工，今個月做到指定營業額，就可以攞個金桶。
港置九龍區區域營業董事姚偉南話，個獎雖然唔係好值錢，但係實力象徵。
佢話準備咗二十三個金桶，乜嘢意思大家明啦！
蘭西
電郵地址：
