馬主H遵醫生囑咐，驗膽固醇、血糖、糖尿等等症狀。人到中年，應酬多，飲食過量，營養未免太豐富，所以唔少朋友都患上血糖過高，膽固醇超標，血管有淤塞表徵等等；化驗報告出嚟嘞，馬主H好似會考攞九A咁高興，因為醫生話：「以你嘅年紀，值九十幾分啦，完全冇事，照食東坡肉都得，不過唔好食得太多呀。唯一弱點，就係注意甲狀腺。」
鬆毛鬆翼之餘，馬主H上日本餐廳，飲紫菜湯，諗住吸收多啲碘質，補吓甲狀腺。點知碰到另外一位老友醫生C，馬主H向佢稟告驗身之事。醫生C大笑：「甲狀腺並非一定與缺碘有關，睇你咁好火氣，可能係過多㖭。一位女士同我講，話老公返到屋企就大發脾氣，無故鬧人，鬧到佢無晒癮，要搞離婚。我請佢老公到醫務所睇一睇，見佢手指震動，雙眼凸出，冇耐性，躁火盛，知佢係患上甲狀腺亢奮，於是叫佢去驗身，證實咗。甲狀腺亢奮多數由stress而來，男人工作壓力大，休息唔夠，運動不足，就容易染上此症。嗰位仁兄睇專家，醫番好，唔再鬧老婆，於是一段婚姻得以挽救成功。」
馬主H聽到眼眨眨，立即唔飲紫菜湯，以免吸收太多碘質。醫生C話：「你不如晚晚早啲返屋企瞓覺啦，星期六日去吓游水，包保減少患上甲狀腺嘅機會！」